“Ambassadors Cultural Club” mədəni mübadilə platformasına çevriləcək. Biz Azərbaycan mədəniyyətinin beynəlxalq aləmlə qarşılıqlı əlaqəsi, ilhamlanması və inkişafı üçün yeni imkanlar yaratmağa çalışırıq”, - deyə “Arts Council Azerbaijan” təşkilatının rəhbəri Dadaş Məmmədov yeni “Ambassadors Cultural Club” mədəniyyət mərkəzinin təntənəli açılışı zamanı bildirib.

Fact-info.az xəbər verir ki, mərkəz “Arts Council Azerbaijan” təşkilatının nəzdində yaradılıb. Mədəniyyət mərkəzinin açılışı çərçivəsində istedadlı Azərbaycan rəssamlarının əsərlərini bir araya gətirən “Rəngarəng duyğular” adlı kollektiv sərgi təqdim olunub. Sərgi yaradıcı yanaşmaların, üslubların və texnikanın zənginliyini nümayiş etdirib.

Sərgidə rəssamlar Ruslan Rüstəmov, Hüseyn Kəngərlı, Mələk Abbaszadə, Nərgiz Quliyeva, Məryəm Kiblayeva, Nigar Əliyeva, Aynurə Mustafayeva, Röya Həsən, Elşən Rzazadə, Leyla Orucova, Leyli Müseyibova, Sevda Rüstəmova, Nailə Məhərrəmova, Sevinc Gəncəli, Təranə Əliyeva, Eldar Babazadə, Aliyə Əsədullayeva, Günay Bəylərova, Nailə Aslanova, Vüsalə Şərifova, Ləman Hacıyeva, Nuray Allahverdiyeva, Nigar Familsoy, Rosa Murad, Gündüz Xunlar, Samirə Muxtarova, Könül Cabbarova iştirak ediblər.

Əsərlər həm rəssamların şəxsi təəssüratlarına, həm də aktual sosial və mədəni problemləri əks etdirən geniş mövzulara işıq tutur.

Açılış mərasimində çıxış edən Dadaş Məmmədov yeni mərkəzin əhəmiyyətindən, diplomatik korpusla uzunmüddətli əməkdaşlıqdan danışıb, xalqlar arasında qarşılıqlı anlaşmanın möhkəmlənməsi üçün mədəni əlaqələrin əhəmiyyətini vurğulayıb.

“Arts Council Azerbaijan” təşkilatı 19 il ərzində Azərbaycan incəsənətini uğurla inkişaf etdirən və populyarlaşdıran beynəlxalq müstəqil platformadır. “Rəngarəng duyğular” adlı sərgi ictimaiyyəti ruhlandırmaq və rəssamların ölkənin mədəni həyatına mühüm töhfələrini qeyd etmək üçün hər il “Arts Council Azerbaijan” kolleksiyasının ən yaxşı əsərlərini bir araya gətirən ənənəvi layihələrdən biridir.