Bosniya və Herseqovinada keçmiş zabit və əsgərlər mülki serblərə qarşı cinayət törətməkdə ittiham olunurlar.

Dövlət ittihamçısı Bosniya və Herseqovina ordusunun keçmiş 10 zabit və əsgərinə mülki serblərə, hərbi əsirlərə qarşı cinayət törətmək ittihamı irəli sürüb.

Prokurorluğun məlumatına görə, 1992-1995-ci illərdə paytaxt Sarayevonun İlidza bələdiyyəsinin Hrasnitsa şəhərində serb məhbuslara qarşı bir sıra hərbi cinayətlər törədilib. Onlar bölgədəki düşərgələrdə və təcridxanalarda qanunsuz saxlanılan 100-dək serb mülki şəxsə, o cümlədən qadınlar, qocalar və azyaşlılara qarşı cinayətlərdə, habelə döyüş bölgələrində məcburi əməyə aparılmış, ölümlə nəticələnən xəsarət və yaralara məruz qalmış və ya öldürülmüş serb əsirlərinə qarşı cinayətlərdə ittiham olunurlar.

Bundan başqa, 1992-ci ildə Priyedor bölgəsində İctimai Təhlükəsizlik Stansiyasında polis dəstəsi komandiri olmuş Draqoljub Qligiç də insanlığa qarşı cinayətlər törətməklə ittiham edilir. Prokurorluq Qligiç haqqında ittihamnamə təqdim edib və bildirilir ki, o, Miska Qlava və Lyubiya bölgələrində 120-dək bosniyalı kişi mülki vətəndaşın qanunsuz tutulması, işgəncə verilməsi və qətlə yetirilməsində bilavasitə iştirak edib. (Azərtac)