Paytaxtla bərabər regionlarımızda da ədəbi, intellektual mühit hər zaman təbii ahəngini və inkişaf tendensiyasını qoruyub saxlayıb. Şirvan ədəbi mühitində  yetişən tanınmış qələm adamı, şair, publisist Ağatahir Cəbirlinin  “1111 beyt və ya Hikmət boğçası”kitabı işıq üzü görüb.

Şairin min beyt halında ərsəyə gətirdiyi bu nəsihətnamə düşünən hər kəs üçün bir ərməğandır. Hikmətli düşüncənin təlatümləri, poetik fikrin  müxtəlif çarlarla zənginliyi şairin ifadə  tərzində gerçəkləşir. 

  Müəllif  beytlərdə beyninin süzgəcindən keçirdiklərini yaşayaraq qələmə alıb.

 “Söz qəlbdən çıxarsa qəlbə qədər gedər, dildən çıxarsa qulağı keçməz”,

“Qəlbi və sözü bir olmayan insanın yüz dilli olsa belə, o yenə dilsiz sayılır”.

  Mənəvi həyatın ölübsə hərgah,

Düşün təfəkkür et, açılsın dərgah!

  Poeziya – tərənnüm simfoniyasıdır, fəlsəfə hikmət, mahiyyət və dəyərlərin məcmusudur.

 Fəlsəfə və poeziya – bir maqnitin iki qütbüdür, onlar ilk baxışda əks tərəfə baxsalar da, əslində bir çevrənin ahəngindədirlər.

 Fəlsəfə sərt külüklər kimi hər şeyi – bütün intellektləri yerindən oynadırsa, mürgüdən oyandırırsa, poeziya incə və xəfif meh kimi hislərin həmahəngliyini nizamlayır, duyğuları maqnit kimi öz qütbünə çəkir.

Fəlsəfə təıfkkürün ləngərliyidir, coşğunluğudur, itiliyidir. Məntiqi nəticəsidir, konkret düşüncələrin son qərarıdır. Poeziya qəlbin coşqunluğudu, hislərin külək kimi əsməsidir, axınıdır, kükrəyən kəhər kimi cilova yatmamasıdır. Hər ikisi daxili-psixoloji ani təkanın və ya içdəki zəlzələnin törəməsidir. Davamlı və dəyişən sonluğudur.

Xatırladırıq ki, bu vaxta qədər Ağatahir Cəbirlinin “Ağlı-qaralı dünyam”, “Bir nur kölgəsiyəm”, “Üç ərəb – üç qərib köçü”, “Üzümə gülənlər…”, “Eşqin qayəsi”, “Dönümsüz hicrət yolu”, “400 beyt-təfəkkür”, Yuxudakı qərib dünya”, “Ruhun şeir həsrəti”, “Sözün məqamında”, “Dinlə, düşün, de…”, Güzgülərə aldanmayın”, “Qəm doğan yerin vüsalı”, “Eşqdilində qəlb sözləri”, “Çalarsız ağ”, “Asılır sözlərim dar ağacından”, “Payızın hıçqırtısı”, “Sevda-qaralı istəklər”, “Şəhidlik Ali Məqamdır”, “İlan həniri”, “Gözlər çəkən gözəlliklər”, “Məhkəmə”, “Arzum istəyim” kitabları nəşr olunub. Şair, publisist Ağatahir müəllimə uğurlar arzulayırıq. Oxuculara isə bu kitabları oxumağı tövsiyə edirik.  

Fact-info.az