Bu il Azərbaycanın neft strategiyasının əsasını təşkil edən, XX əsrin ən əhəmiyyətli hadisələrindən biri kimi “Əsrin müqaviləsi” adı ilə tarixə düşən, Ümummilli Lider Heydər Əliyevin böyük və gərgin zəhməti sayəsində Azərbaycan Respublikası Dövlət Neft Şirkəti ilə xarici neft şirkətləri konsorsiumu arasında imzalanan ilk neft müqaviləsinin təsis edilməsindən 30 il ötür. Bu münasibətlə Cəfər Cabbarlı adına Respublika Gənclər Kitabxanasında “Əsrin müqaviləsi-30” adlı elektron məlumat bazası hazırlanaraq virtual rejimdə istifadəçilərə təqdim edilib.

Kitabxanadan Fact-info.az-a bildirilib ki, elektron məlumat bazası kitabxananın rəsmi saytında yerləşdirilib.

Kitabxana əməkdaşları tərəfindən hazırlanan bazada YAP Siyasi Şurasının üzvü Qafar Əliyevin “Əsrin müqaviləsi” beynəlxalq əhəmiyyətli hadisədir”, tarix üzrə fəlsəfə doktoru Pərviz Səfərovun “XX əsrin 90-cı illərinin birinci yarısında Azərbaycan Respublikasının Rusiya, İran, Türkiyə ilə Xəzərin enerji ehtiyatlarının işlənməsi sahəsində əməkdaşlığı” kimi məqalələrin tam mətni ilə yanaşı, “Heydər Əliyev və əsrin müqaviləsi”, “Əsrin müqaviləsi haqqında”, “Rəsmi sənədlər”, “Neft strategiyası” kimi keçidlər də mövcuddur. Elektron bazada neft strategiyası mövzusunda Azərbaycan, ingilis və rus dillərində çap edilən kitab və məqalələrin siyahısı, virtual kitab sərgisi, foto və videoqalereya da sərgilənir.