2024-cü ildə sülh gündəliyində ciddi irəliləyiş olmadı. Əvəzində Ermənistan silahlanmaya daha çox cəhd göstərdi, Avropa İttifaqının sülhməramlı adı altında vizual kəşfiyyatçılarını şərti sərhəddə yerləşdirib. Görünən odur ki,  Paşinyan bu ildə sülh imitasiyası ilə təhlükəli oyunlarını  davam etdirib. O, sülhdən danışaraq öz müdafiə nazirini dünyanın müxtəlif paytaxtlarına silah almaq məqsədilə danışıqlara göndərib. Aİ sülhməramlılarının vaxtını və sayını artırmaq istəyir. Bütün bunlardan bu qənaətə gəlmək olar ki,  N. Paşinyan vaxtı uzatmaq üçün öz ölkəsinə qarşı müharibə, təcavüz görüntüsü yaratmaq istəyir. Guya Azərbaycan Ermənistana qarşı hücum təşkil edəcək, sabitlik pozulacaq. O, çox konfiqurasiyalı məkrli gedişlərlə dünyada və regionda vəziyyətin dəyişəcəyini gözləyir.

 Əslində Azərbaycan öz ərazi bütövlüyünü bərpa edib. Sərhəd məsələrinin mövcud təcrübəyə və beynəlxalq hüquqa uyğun  tam həlli üçün zaman lazımdır. Zəngəzur dəhlizi ilə bağlı bizim milli maraqlarımıza uyğun olaraq açılmasında heç şübhəsiz ki, müxtəlif variantlar mövcuddur. O baxımdan Ermənistanla istər sülh müqaviləsinin imzalanması, istər sərhəddə demarkasiya və delimitasiya prosesində tələsməyə ehtiyac yoxdur.

  Müşahidələr göstərir ki, baş nazir N. Paşinyan öz ölkəsinə qarşı müharibə, təcavüz görüntüsü yaratmaqla Azərbaycanı hərbi müdaxilələrə çəkmək istəyir. Belə məqamlarda ehtiyatlı davranmaq lazımdır. Haqlı olduğumuz halda beynəlxalq təhdidlərlə üzləşə bilərik. Demək olar ki, N. Paşinyanın istəyi də budur. Unutmaq olmaz ki, siyasət həm də şahmat oyunudur. Mövcud məsələlərin çözülməsi emosiyalara deyil, qarşı tərəfləri məqamı gələndə mat qoymaqla yekunlaşa bilər.  

 Əkrəm Bəydəmirli