“Azərbaycan mədəni dəyərlərinin dünyada təbliğ edilməsində xaricdə yaşayan soydaşlarımızın rolu əvəzsiz və misilsizdir”.

Fact-info.az xəbər verir ki, bu sözləri AZƏRTAC-a müsahibəsində Azərbaycanın mədəniyyət naziri Adil Kərimli deyib.

Nazir bildirib ki, Prezident İlham Əliyevin rəhbərliyi ilə həyata keçirilən mədəniyyət siyasətinin əsas istiqamətlərindən biri Azərbaycan mədəniyyətinin xaricdə təbliğ edilməsi, mədəni dəyərlərimizin dünyaya çatdırılması, eyni zamanda, mədəni əlaqələrin qurulması, xüsusilə də mədəni irsimizin dünyaya çatıdırlmasıdır. Onun sözlərinə görə, bu, vacib, sistemli bir fəaliyyətdir. Mədəniyyət naziri vurğulayıb ki, onlarla məhz bu istiqamətdə həyata keçirilməli olan fəaliyyətləri müzakirə etmək və fikir mübadiləsi aparmaq əsas hədəflərimizdən biridir.

İtaliyanın paytaxtı Romada keçirilən Azərbaycan Mədəniyyət Elçiləri Toplantısının əhəmiyyətindən danışan Adil Kərimli qeyd edib: “Xaricdə yaşayan, xüsusilə mədəniyyətimizi təbliğ edən soydaşlarımızla çox mühüm görüş keçirdik. Diasporla İş üzrə Dövlət Komitəsinin və Azərbaycanın İtaliyadakı səfirliyinin dəstəyi ilə keçirilən bu toplantı 2025-ci ildə əsası qoyulacaq Azərbaycan Mədəniyyət Elçiləri Forumunun əsas, ilkin təməlidir. Həmin istiqamətdə ciddi işlər həyata keçirilməkdədir və bugünkü toplantı məhz onun əsas başlanğıcıdır. Eyni zamanda, bir sıra böyük layihələrin həyata keçirilməsi, eləcə də dəyərli sənətkarlarla, xüsusilə xaricdə təhsil alan, mədəniyyətin ayrı-ayrı sahələri üzrə dövlət tərəfindən dəstək verilərək dünya şöhrətli universitetlərdə öz təhsillərini müxtəlif pillələrdə davam etdirən və bitirən tələbələrlə, peşəkar fəaliyyətlə məşğul olan soydaşlarımızla, dəyərli ziyalılarımızla birgə ciddi bir vahid platformanın əsasının qoyulması və bu istiqamətdə sistemli fəaliyyətin həyata keçirilməsi əsas hədəflərimizdəndir. Düşünürük ki, bugünkü toplantı bizə həmin istiqamətə çox nikbin baxmağa əsas verir”.