Cənubi Qafqaz qlobal güclərin müharibə arealına çevrilə biləcək riskli bölgələrdən biri sayıla bilər. Çünki burda iki qlobal gücün Azərbaycan, Gürcüstan və Ermənistan üzərindən siyasi və hərbi strateji maraqları toqquşur. Bunlar Avropa İttifaqı, Rusiya və onu dəstəkləyən qüvvələrdir.

 Fact-info.az  525.az-a istinadən xəbər verir ki, bu barədə hərbi ekspert Elxan Şıxəliyev deyib.

Onun sölərinə görə, siyasi münasibətləri kəskin fazaya keçənlər üçüncü ölkələrdə böhran yaradırlar və bu, daha sonra müharibə səbəbinə çevrilir: “Bunun nümunələri də var. Əslində Cənubi Qafqaza gəlməzdən əvvəl presidentlər artıq var idi. Gürcüstan, Moldovadakı hadisələr, indi də Ukrayna. Üç ildir ki, Ukrayna müharibədən çıxa bilmir. Dördüncü coğrafiya olaraq Ermənistanı qeyd etmək olar. Ermənistanla indi bu planın həyata keçirilməsi Azərbaycan-Ermənistan münasibətləri baxımından daha uyğun görünür. Bu səbəbdən Ermənistanın silahlanması da təsadüfi deyil. Yəni, bu silahlanma böyük planın bir hissəsidir”.

E.Şıxəliyev deyib ki, silahlanmanın əsas moderatoru Avropa İttifaqı və NATO adına Fransadır: “Ermənistana Fransadan, Hindistandan, Yunanıstandan, İrandan, Rusiyadan, çox fərqli istiqamətlərdən fərqli silahlar tədarük edilir. Xüsusən də nə qədər bunu özünün müdafiə silahları adlandırsa da, biz görürük ki, ən azından Fransadan aldığı “Sezar”  özüyeriyən artilleriya sistemi 28 km dərinliyində zərbə endirə biləcək silahdır. Hindistandan alınan ATAGS-an isə yedəkdə daşınan haubitsalardır və 30 km-ə yaxın məsafədə zərbələr  endirə bilir. İndi bunun içində Hindistanın “Akaş” hava hücumundan müdafiə raket sistemləri də var. Pinaka reaktiv yaylım atəş sistemləri də eyni dərinliyə qədər zərbələr endirə bilən artileriya və raket sistemləridir. Bundan başqa,  Hindistandan Ermənistana “Pralay” raket siistemləri də tədarük olunacaq. Bu raket sistemlərinin zərbə endirmək gücü 500 km-dir. Eyni zamanda, Yunanıstandan S-300 hava hücumundan müdafiə komplekslərinin silahlanmaya daxil edilməsi müzakirə olunur. Ümumiyyətlə, son illər Ermənistan öz hərbi büdcəsini də artırıb. İki il ərzində bu ölkə hərbi büdcəsini 46 faiz artıraraq, silahlanmaya 2 milyard dollara yaxın vəsait xərcləyib. 2025-ci ildə də bu tempin daha da aktiv fazaya keçəcəyini demək olar”.

Ekspert hesab edir ki, Ermənistanı və onu dəstəkləyən qüvvələrin planları sırf İrəvanı silahlandırmaq və sonradan bu və ya digər formada sülh sazişinin bağlanmamasına təhrik etməklə, günün birində şərti sərhəddə hər hansı bir münaqişə yaratmaq, onu böyük çaplı əməliyyatlara çevirməkdir: “Fransa sülh sazişinin imzalanmamasında daha çox maraqlı görünür. Çünki sülh sazişi imzalananda bütün qeyd edilən ehtimallar sıfırlanacaq, sülh sazişi olmayanda atəşkəsin müharibə formasına keçməsi asanlaşır. Hazırda həmin qüvvələr Azərbaycan-Ermənistan münasibətlərinin üzərindən cəbhə açmaqla yanaşı, Rusiya ilə Ermənistanı qarşı - qarşıya gətirib ikinci cəbhə açmaq planları da var. İndi Ermənistan Rusiyanın təhlükəsizlik çətiri altından çıxıb, NATO-nun təhlükəsizlik çətiri altına keçmək uğrunda mübarizə aparır, Rusiya isə bunu özünün qırmızı cizgisi hesab edir. Ermənistanın ərazisində Rusiyanın 102-ci hərbi bazası mövcuddur. Bir yandan Türkiyə ilə sərhəddə Federal Sərhəd Xidmətinin hərbçiləri var, digər tərəfdən tərkibində NATO-ya daxil olan ölkələrin  hərbçiləri də olan Avropa İttifaqının “mülki missiyası” Ermənistan ərazisindədir. Onların arasında Fransadan, Kanadadan hərbçilər var.  Bu qədər fərqli cəbhələrdə olan iki qütbün həbçilərini, mütəxəssislərini ərazisinə cəlb edən Ermənistanın təbii ki, bunun içərisindən müharibəsiz, münaqişəsiz çıxması çətin olacaq”.