Maqsud İbrahimbəyov Yaradıcılıq Mərkəzində kəlağayının UNESCO-nun Qeyri-Maddi Mədəni İrs üzrə Reprezentativ Siyahısına daxil edilməsinin 10 illiyinə həsr olunmuş tədbir keçirilib.

Fact-info.az xəbər verir ki, “İnkişaf” elmi mərkəzi və Basqal “Kəlağayı” İpək Mərkəzinin birgə təşkil etdikləri tədbiri giriş sözü ilə açan Maqsud İbrahimbəyov Yaradıcılıq Mərkəzinin direktoru Anna İbrahimbəyova bildirib ki, mədəni irsin qorunması və yaşadılması xalqın gələcəyinə olan töhfədir.

Tədbirdə çıxış edən Azərbaycanın Xalq yazıçısı Maqsud İbrahimbəyovun ailəsinin üzvü Rəna İbrahimbəyova kəlağayının tarixi və mədəni əhəmiyyətindən bəhs edib, həmçinin bu nadir milli atributun fəlsəfi cəhətlərinə toxunub. Onun sözlərinə görə, kəlağayı sadəcə qadın baş örtüsü deyil, həmçinin rəmzi və dərin məna daşıyıcısı kimi qiymətləndirilməlidir. O, zərif cinsini nümayəndələrinin müdafiəsi, müdriklik, gözəllik simvoludur və xalqımızın mədəniyyətinin dərinliklərinə nüfuz edir.

Rəna xanım qeyd edib ki, kəlağayı sənətinin bərpası və populyarlaşması ölkə rəhbərliyinin mədəni irsə diqqətli münasibətinin nəticəsidir: “Bu gün kəlağayı yeni məzmunla zənginləşib, daha rəngarəng olub və gözəlləşib. Bütün bunlar bu prosesdə əməyi danılmaz və əvəzsiz olan birinci xanımımız Mehriban Əliyevanın səyləri nəticəsində mümkün olmuşdur. Onun təşəbbüsləri sayəsində kəlağayı dünya mədəniyyət məkanında layiqli yer tutdu”.

O, həmçinin jurnalistlərlə söhbətində kəlağayının UNESCO-nun siyahısına salınmasının tarixi nailiyyət olduğunu qeyd edib: “On il əvvəl, 2014-cü il noyabrın 26-da əlamətdar hadisə baş verdi - kəlağayı bəşəriyyətin qeyri-maddi mədəni irsinin obyekti kimi tanındı. Bu addım mədəniyyətimizin unikallığını vurğulamaqla yanaşı, onun beynəlxalq aləmdə əhəmiyyətini möhkəmləndirir. Biz fəxr edirik ki, milli rəmzimiz dünya irsi xəzinəsində öz layiqli yerini tutub”.

Rəna xanım kəlağayının təkcə praktiki deyil, həm də dərin fəlsəfi funksiyanı yerinə yetirən universallığına diqqət çəkib: “Kəlağayı vasitəsilə insanlar öz duyğularını ifadə edir, düşüncələrini, dəyərlərini çatdırır. Bu, sadəcə geyim elementi deyil, nəsilləri və mədəniyyətləri birləşdirən ünsiyyət vasitəsidir. Məhz bu anlayış UNESCO-nun mütəxəssisləri üçün həlledici oldu və onlar yekdilliklə onun Qeyri-Maddi Mədəni İrs üzrə Reprezentativ Siyahısına daxil edilməsinə səs verdilər”.

O, həmçinin qeyd edib ki, kəlağayının beynəlxalq səviyyədə tanınması uzun və gərgin işin nəticəsidir.

“Dünya irsinin çoxsaylı nadir elementləri arasında kəlağayını müəyyən etmək asan məsələ deyildi. Amma birinci xanımımızın peşəkarlığı və əzmkarlığı sayəsində bu, reallığa çevrildi. Bu gün fəxrlə deyə bilərik ki, Azərbaycan dünya mədəniyyətinə mühüm töhfə verib və bu töhfədə kəlağayı mühüm rol oynayır”, - deyə Rəna xanım sözlərini yekunlaşdırıb.