8 Noyabr – Zəfər Günü münasibətilə Cəfər Cabbarlı adına Respublika Gənclər Kitabxanasının əməkdaşları tərəfindən hazırlanan “44 günlük Zəfər tariximiz” adlı elektron məlumat bazası istifadəçilərə təqdim edilib.

Kitabxanadan Fact-info.az-a bildirilib ki, bazada “Rəsmi sənədlər”, “10 Noyabr Bəyanatı”, “Müsahibə və çıxışlar”, “Xronologiya” kimi bölmələrlə yanaşı, “44 günlük Vətən müharibəsi”, “Vətən müharibəsi - qəhrəmanlıq salnaməmiz”, “Vətən müharibəsi - tarixi Zəfərimiz” kimi məqalələrin tam mətni də yer alır.

“44 günlük Zəfər tariximiz” adlı elektron məlumat bazasında Azərbaycan Ordusunun düşməndən ələ keçirdiyi hərbi qənimətlər, Ermənistan qoşunlarının döyüş itkiləri, Vətən müharibəsində Azərbaycanın dinc əhalisinə qarşı törədilmiş terror aktları haqqında da geniş məlumat verilir. Elektron bazada şanlı Zəfər tarixinin qürurverici anlarını özündə əks etdirən Zəfər Paradı, geri qaytarılmış torpaqlara “Böyük qayıdış”, burada aparılan bərpa-quruculuq işləri haqqında məlumatlar, II Qarabağ müharibəsinə dair Azərbaycan və xarici dillərdə nəşr edilən kitab və dövrü mətbuat nümunələrinin siyahıları təqdim olunur. Bazada Gənclər Kitabxanasının əməkdaşları tərəfindən 8 Noyabr – Zəfər Günü ilə əlaqədar hazırlanan virtual kitab sərgisi və multimediya materialları da yer alıb.

Elektron məlumat bazası kitabxananın rəsmi saytında yerləşdirilib.