Azərbaycanın sosial-iqtisadi islahatlara əsaslanan inkişaf konsepsiyasında davamlı inkişafının əsas komponenti olan yaşıl iqtisadiyyata keçid mühüm yer tutur. Azərbaycanın 5 milli prioritetindən biri "Təmiz ətraf mühit və yaşıl artım ölkəsi" kimi müəyyən edilib. Həmin prioritetə uyğun olaraq ətraf mühitin sağlamlaşdırılması, yaşıllıqların bərpası və artırılması və su ehtiyatlarından, dayanıqlı enerji mənbələrindən səmərəli istifadənin təmin edilməsi istiqamətində işlər aparılır.

Fact-info.az xəbər verir ki, bunu Ekologiya və Təbii Sərvətlər Nazirliyinin şöbə müdiri Səyyarə Məmmədova ADA Universitetində keçirilən "Qlobal iqlim dəyişikliyi və insan sağlamlığı: Təsirlərin azaldılmasında davamlı həllər və innovativ təşəbbüslər" mövzusunda konfransda deyib.

Onun sözlərinə görə, ekoloji problemlərdən biri olan qlobal iqlim dəyişmələri dayanıqlı inkişafın nəinki ekoloji, həm də iqtisadi-sosial aspektlərinə ciddi təsir göstərir. Şöbə müdiri bildirib ki, beynəlxalq ictimaiyyətin məsuliyyətli və etibarlı üzvü kimi Azərbaycan iqlim dəyişmələri ilə bağlı qlobal məsələlərin həllinə böyük önəm verir və bu istiqamətdə əməli işlər görür.

"Azərbaycan iqtisadiyyatının mühüm sektoru olan kənd təsərrüfatı iqlim dəyişikliklərinin təsirlərinə qarşı daha həssasdır. Quraqlığa davamlı məhsullar, səmərəli suvarma, ağıllı kənd təsərrüfatı təcrübələrindən yararlanmaqla ərzaq təhlükəsizliyinin təmin edilməsi qarşıya məqsəd qoyulub. Ölkə ərazisində su ehtiyatlarından səmərəli istifadə ilə bağlı mühüm su təsərrüfatı infrastrukturları yaradılıb. Su itkilərinin qarşısının alınması məqsədilə suvarma kanallarının yenidən qurulması və bərpası, içməli su mənbələrinin yaradılması, həmçinin su ehtiyatlarının artırılması və yeni su anbarlarının yaradılması istiqamətində tədbirlər həyata keçirilir. Buna baxmayaraq, su ehtiyatlarına tələbatın artması fonunda iqtisadiyyatın bütün sahələrində qənaətedici su texnologiyalarından istifadənin daha böyük tətbiqi, suya tələbatın tullantı sularının təmizlənərək təkrar istifadəsi yolu ilə ödənilməsi mühüm əhəmiyyət kəsb edir.

Ekologiya və Təbii Sərvətlər Nazirliyi tərəfindən həyata keçirilən yaşıllaşdırma layihələrində əsas su mənbəyi kimi təkrar emal olunan sulardan istifadə olunur. Bu, həmçinin içməli su ehtiyatlarının qorunmasına, həm də suların təkrar dövriyyəsini təmin etməklə onlardan səmərəli istifadəyə gətirib çıxarır.

Ətraf mühitə buraxılan zərərli qazların udulması və sağlam ekoloji mühitin yaradılması məqsədilə ölkədə meşə və yaşıllıq ərazilərin genişləndirilməsi üçün kütləvi şəkildə ağacəkmə aksiyaları həyata keçirilir. Təkcə ötən il ölkə ərazisində 4 milyona yaxın ağac əkilib. Cari ildə 5 milyon ağacın əkilməsi hədəflənib. Hazırda payız əkin mövsümünə start verilib. Bir çox dövlət qurumları, ictimaiyyət nümayəndələri, məktəblilərlə birlikdə ağacəkmə aksiyaları keçiririk", - deyə S.Məmmədova qeyd edib.