Oktyabrın 8-də X Bakı Beynəlxalq Kitab Sərgisində Xalq şairi Ramiz Rövşənin “Nəfəs” kitabının təqdimatı keçirilib.

Fact-info.az xəbər verir ki, təqdimat zamanı şair piratçılığın qarşısının alınması məqsədilə kitabın imzası ilə çap olunduğunu diqqətə çatdırıb. Qeyd olunub ki, kitabda müəllifin şeirləri ilə yanaşı, məşhur İran rəssamı Ərdəşir Rüstəminin şairin əsərlərinə çəkdiyi şəkillər yer alıb.

Xalq şairi kitablarla ünsiyyətin daha səmimi olduğunu qeyd edərək deyib: “Kitab oxuyan insanın öz dünyası olur, o, başqalarının həyatına qarışmır. Mən lap uşaqlıqdan yeməyi belə kitab oxuya-oxuya yeyirdim. Mənim üçün ən kədərli hal odur ki, kitabxanama baxanda oradakı kitabların hamısını oxumağa ömrümün çatmayacağını anlayıram. Kitabların heç 40 faizini belə oxuya bilməmişəm, lakin onlar hər zaman mənə dayaq olub. Mən Fyodor Dostoyevskinin "Cinayət və Cəza" əsərini, o cümlədən Füzulini, Sabiri, Səməd Vurğunu, Məmməd Arazı, Bəxtiyar Vahabzadəni oxumasaydım, bugünkü Ramiz Rövşən ola bilməzdim. Odur ki, kitab sərgisi mənim düşüncəmə görə çox dəyərlidir”.

Şair, həmçinin öz şeirlərindən bir neçəsini səsləndirib, oxucuların suallarını cavablandırıb və kitablarını onlar üçün imzalayıb.