COP29-u keçirəcək Azərbaycan iqlim sahəsində qlobal liderə çevrildi.

Fact-info.az xəbər verir ki, bu barədə BMT-nin İqlim üzrə Katibliyinin Hesabat İdarəsinin direktoru Donald Kuper Bakıda keçirilən Yüksək Səviyyəli Dialoq çərçivəsində "2 illik şəffaflıq hesabatları (BTR) - milli potensialın yaradılması üçün vasitə" panelində deyib.

Kuper sadə insanlara iqlim problemlərinin aydın dillə izah edilməsinin çox vacib olduğunu vurğulayıb və dünya ölkələrinin siyasətçiləri və məmurları bu məsələni iqlim dəyişikliyi ilə mübarizədə irəliləyiş əldə edərkən unutmamalı olduğunu bildirib.

"Dünyada bir çox insan bəşəriyyətin qarşılaşdığı real iqlim problemləri barədə geniş məlumatlara sahib deyil, əsas problemlər terminlər və onların başa düşülmə çətinliyidir. Fəaliyyətlərin və hesabatların detallarını daha çox izah etmək lazımdır", - o qeyd edib.

Kuper noyabrda başlayacaq COP29-a və 3 sentyabrda Bakıda başlanan Qlobal İqlim Şəffaflıq Platformasına (Baku Global Climate Transparency Platform/BTP) görə Azərbaycana təşəkkür edib.

"İdeyalarımızı irəli sürdüyünə görə tərəflərə, eləcə də, Azərbaycana bizi irəliyə aparan qlobal liderə çevrildiyinə görə və dünyanın daha 1 il, 10 il, 50 il və s. yaşamasını təmin etmək yükünü daşıyanlara təşəkkür etmək istəyirəm", - o əlavə edib.

Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.

Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.

Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.