Türk dünyası ilə sıx inteqrasiya yolunu əsas götürən Azərbaycan Prezident İlham Əliyevin rəhbərliyi ilə bu böyük ailənin hər bir üzvü ilə daha yaxından dostluq və qardaşlıq əlaqələrinin qurulmasını gündəmdə saxlayır. Qardaş Türkiyə, Mərkəzi Asiyanın ərazi və əhali ehtiyatlarına görə böyük dövlətləri olan Qazaxıstan və Özbəkistan, məsafəcə uzaq olsa da mənəvi cəhətdən bir qardaş qədər yaxın olan Qırğızıstan, həmçinin Türkmənistanla son illər yaradılmış sıx siyasi, iqtisadi və mədəni əlaqələr dərinləşməklə Azərbaycanın təkcə Cənubi Qafqazda deyil, bütün Avrasiya məkanında mövqeyini möhkəmləndirir, beynəlxalq arenada da söz sahibinə çevirir. Bu mənada, ötən həftə Azərbaycan Respublikası Prezidentinin Özbəkistana dövlət səfəri xalqlarımız arasındakı çoxəsrlik dostluq münasibətlərimizin inkişafında tarixi hadisə olmaqla, bölgədə formalaşmış əlverişli siyasi və iqtisadi konyunktura mühitində həm iki qardaş ölkənin, həm də ümumilikdə, Türk dünyasının mənafeləri naminə mühüm addımdır.Fact-info.az-ın məlumatına görə, bu sözləri AZƏRTAC-ın Naxçıvan bürosuna açıqlamasında iqtisadçı-ekspert, Naxçıvan Dövlət Universitetinin dosenti Əli Cabbarov söyləyib.

O qeyd edib ki, Özbəkistan Mərkəzi Asiyanın ərazisi, münbit torpaqları və əhali ehtiyatlarına görə böyük ölkələrindən biridir. Bu ölkə haqqında danışanda keçmiş SSRİ-də ən çox pambıq istehsalı yada düşür. Ona görə də özbəkistanlı iş adamlarının Azərbaycanın müxtəlif şəhərlərində, xüsusən Qarabağda tekstil və toxuculuq sahəsinə qoyacağı milyonlarla dollar sərmayə çox cazibədardır. Özbəkistan turizm sahəsində də tanınır. Ölkənin tarix qaynayan bir çox şəhərləri, xüsusən, mədəniyyətlərin kəsişmə nöqtəsi kimi tanınan Səmərqənd bu regionun turizm mərkəzi olmaqla, həmişə insanları özünə cəlb etməkdədir. Söhbət Azərbaycan-Özbəkistan əlaqələrindən getdikdə hər iki xalqın bir-birinə olan xoş münasibəti, eləcə də Özbəkistanda Azərbaycan mədəniyyəti və musiqisinin populyarlığı, Azərbaycanda da özbək musiqisinə olan maraq yada düşür. Qarşılıqlı əlaqələr xüsusilə xalqlarımızın müstəqillik illərində daha da artıb və gələn il diplomatik əlaqələrin yaradılmasının 30 illiyi qeyd olunacaq. Dövlət başçımız İlham Əliyevin Özbəkistana dövlət səfəri zamanı imzalanmış Müttəfiqlik bəyannaməsi isə ərazicə uzaq olsalar da, eyni tarixi kökü paylaşan bu iki qədim mədəniyyət beşiyinin bir-birinə olan bağlılığından xəbər verir. Bu mənada, xüsusən, tarixi-mədəni turizm ehtiyatları ilə zəngin olan Özbəkistanın Azərbaycanın turizm sənayesi ilə əməkdaşlığı buradakı potensialı turizm məhsuluna çevirməkdə faydalı olacaq.

Əli Cabbarov vurğulayıb ki, Azərbaycan və Özbəkistanın müttəfiq olması təkcə tarixdən gələn ənənələrdən deyil, həm də iki dövlətin bugünkü geostrateji mövqeyindən, sahib olduğu təbii ehtiyatlardan və iki dövlət başçısının şəxsi dostluq münasibətlərindən qaynaqlanan qarşılıqlı etimadla sıx bağlıdır: “Əsası Naxçıvanda qoyulmuş Türk Dövlətləri Təşkilatında Özbəkistanın fəal iştirakı və Azərbaycanın Qarabağ mübarizəsində daim yanımızda olması hər zaman olduğu kimi, bu gün də xalqlarımızın mənəvi yaxınlığının bünövrəsini təşkil edir. Qarabağın düşmən tapdağından azad edilməsindən sonra Özbəkistanın burada bərpa və quruculuq işlərində fəallığı da Azərbaycana verilən mənəvi dəstək kimi özünü beynəlxalq aləmdə simvolizə edib. Azərbaycanı Özbəkistana cəlb edən mühüm iqtisadi faktor ölkəmizdəki sabitlik, investisiya mühiti və şübhəsiz bu ölkənin Avropa bazarlarında mövqe tutmasına fürsətlər yarada biləcək tranzit mövqeyidir. Bu mənada, enerji resursları, xüsusən də “yaşıl enerji” ilə zəngin olan Özbəkistanda daxili tələbatdan on dəfələrlə artıq istehsal olunan enerjinin xaricə ixracı üçün Azərbaycanın imkanları özbək qardaşlara ən rahat yol olacaq. Bu baxımdan Prezident İlham Əliyevin Özbəkistana dövlət səfəri xüsusi əhəmiyyət daşıyır”.

“Humanitar-mədəni sahədəki əlaqələrə gəldikdə isə deyə bilərəm ki, şübhəsiz, bütün müqavilələrin, iqtisadi sahədəki bütün uğurların sonunda insanları bir-birinə bağlayan mədəni əlaqələr, humanitar tellər dayanır. Bu mənada, səfər zamanı Azərbaycanın Birinci vitse-prezidenti Mehriban xanım Əliyevanın Özbəkistanda keçirdiyi görüşlər xalqlarımız arasında tarixən mövcud olmuş mədəni əlaqələrin daha da dərinləşməsi, humanitar müstəvidə gələcək layihələrin həyata keçirilməsi baxımından olduqca uğurlu olub. Özbək xalqının sahib olduğu mədəni sərvətlərlə tanışlıq, eləcə də Azərbaycan mədəniyyətinin bu ölkədə tanıdılması Mehriban xanım Əliyevanın bu sahədə həyata keçirdiyi missiyanın uğurlu nümunəsi kimi də yadda qaldı”, - deyə iqtisadçı-ekspert vurğulayıb.