Prezident İlham Əliyevin Almaniya Kansleri Olaf Şoltsun dəvəti ilə Almaniyaya səfəri, keçirdiyi görüşlər, eyni zamanda "15-ci Petersberq İqlim Dialoqu"nun Yüksək Səviyyəli Seqmentində iştirakı növbəti tarixi hadisə oldu.

Bunu  politoloq Azər Qarayev deyib.

A.Qarayev bildirib ki, Prezident İlham Əliyevin Berlində keçirilən "Petersberq İqlim Dialoqu" formatındakı müzakirələrə dəvət olunması bir yandan Azərbaycanın dünyada artan nüfuzu, iqlim dəyişikliyi ilə mübarizəyə verdiyi fəal dəstəklə bağlıdırsa, digər tərəfdən bu, bilavasitə Prezidentimizin şəxsi hörmətindən irəli gəlir.

Onun sözlərinə görə, Azərbaycan və Almaniya arasında dostluq və tərəfdaşlıq münasibətləri var.

"Zaman keçdikcə biz qarşılıqlı əlaqələrin inkişaf etdiyinin də şahidi oluruq. Ötən dövr ərzində iqtisadi və ticarət əlaqələrinin genişlənib, ticarət dövriyəsində müsbət nəticələr əldə olunub. Azərbaycan-Almaniya münasibətləri ümumilikdə yüksələn xətt üzrə genişlənir. Azərbaycanla əlaqələri daim inkişaf edən Avropa dövlətlərindən biri də Almaniyadır. Dünyanın siyasi-iqtisadi müstəvisində əhəmiyyətli rol oynayan bu dövlətlə Azərbaycan arasında ümumilikdə 80-ə yaxın sənəd imzalanıb. Bu da münasibətlərimizin səviyyəsini göstərən mühüm faktordur", - deyə A.Qarayev əlavə edib.

O, qeyd edib ki, Almaniyanın Ermənistanla Azərbaycan arasında danışıqlara məkan rolunda çıxış etmək istəməsinə gəldikdə isə, burada Azərbaycan üçün etiraz doğuran məqam yoxdur:

"Almaniya Azərbaycanın Cənubi Qafqazda müsbət rolunu, sülh və təhlükəsizliyə, iqtisadi inkişafa gətirdiyi reallıqları aydın görür, əlaqələrin genişlənməsinə çalışır. Həmçinin Azərbaycanın güvənli, mövqeyinin dəyişməz olması, atdığı hər bir imzasına yüksək dəyər verməsi dost ölkənin diqqətindən yayınmır. Bu da dövlətlərimiz arasında xüsusən iqtisadi əməkdaşlığın dərinləşməsinə səbəb olub. Azərbaycanda mövcud olan möhkəm sabitlik və əlverişli investisiya mühiti Almaniya şirkətlərinin diqqətindədir.