32 il əvvəl Ağdabanda ermənilərin törətdiyi soyqımı hadisələrinin ildönümüdür. Təbii ki, insanlığa qarşı törədilmiş heç bir qanlı hadisə unudulmayacaq. Bir qrup Vətəndaş Cəmiyyəti təmsilçisinin, həmçinin Ağdaban sakinlərinin bəyanatı oldu. Müxtəlif anma tədbirləri keçirilir. Bu bu addımlar çox zəruridir.

Amma heç zaman unudulmayacaq belə qanlı hadisələr beynəlxalq məhkəmələrin müzakirəsinə çıxarılmalıdır. Müasir dünyanın hüquq sistemi ilə ziddiyyət təşkil soyqırım cinayətləri cəzasız qalmamalıdır. Bunun üçün bəyanatlar, hər il qanlı hadisələrin ildönümləri ilə bağlı anma tədbirlərinin təşkili yetərli deyil.

Bu məqamları dəfələrlə qeyd etmişik ki, peşəkarların iştirakı ilə soyqırımı cinayətləri ilə bağlı kitabların yazılışı, sənədli filmlərin çəkilişi zəruridir. Daha bir zəruri məqam ondan ibarətdir ki, Xocalıda, Meşəlidə, Quşçularda, Malıbəylidə, Qaradağlıda, Ballıqayada, Başlıbeldə və digər məkanlarda ermənilərin törətdiyi qanlı hadisələrlə bağlı beynəlxalq məhkəmələrdə davamlı iş aparılmalıdır. İctimaiyyət nümayəndələrinin, QHT-lərin bəyanatı, müraciəti lazımdır. Lakin yetərli deyil.

Daha təsiredici mexanizmlər üzərində düşünmək lazımdır. Bu mexanizmlər yalnız biri erməni cinayətlərinin beynəlxalq məhkəməyə yönəltməkdir. Təkzibolunmaz faktlar var, qanlı hadisələrdən zərər çəkən şahidlərin xeyli hissəsi sağdır. Deməli, peşəkar heyətlə, bu faktları qaldırmaqla beynəlxalq müstəvidə xeyli addımlar atmaq mümkün olar.

Məntiqli və yetərincə faktlara, sübutlara əsaslanan məhkəmə çəkişmələri yalnız ədaləti bərpa etmək üçün deyil, həm də dünyada soyqırım törətməyə, cinayətə meylli erməni faktoruna tutarlı cavab olar.

Əkrəm Bəydəmirli