Baş nazir Nikol Paşinyanın Ermənistanın Kollektiv Təhlükəsizlik Müqaviləsi Təşkilatında (KTMT) fəaliyyətinin dondurulması barədə səsləndirdiyi bəyanat siyasi manipulyasiya xarakteri daşıyır. Çünki KTMT-nin nizamnaməsində hər hansı bir üzv dövlətin fəaliyyətinin dondurulması məsələsi əks olunmayıb. Nizamnaməyə əsasən, üzv dövlət təşkilatdan çıxa və yaxud fəaliyyətini davam etdirə bilər.

Fact-info.az xəbər verir ki, bu fikirləri “Valday” klubunun proqram direktoru, Rusiyanın tanınmış politoloqu Timofey Bordaçev “Взгляд” qəzetinə müsahibəsində deyib.

Politoloq diqqətə çatdırıb ki, N.Paşinyan, sadəcə olaraq, üzv dövlətlərə təşkilatın işində Ermənistanın iştirak etməyəcəyini bildirib. Onun bəyanatı hüquqi deyil, siyasi xarakter daşıyır və bununla da N.Paşinyan Qərbə sığınaraq onu regiona cəlb etməyə çalışır. “Ermənistanın KTMT-də fəaliyyətini dondurub” deməklə N. Paşinyan Rusiya başda olmaqla, digər üzv dövlətlərə qarşı bəslədiyi münasibəti xarakterizə edib. Rəsmi İrəvan belə bəyanatlarla Qərbə “xoş mesajlar” ötürməklə məşğuldur”, - deyən politoloq vurğulayıb ki, Azərbaycan təzyiq göstərərək Ermənistanı sülh müqaviləsi imzalamaq istiqamətində addımlar atmağa məcbur etmək istəyir. Ermənistan isə müstəqil addım ata bilmədiyini ortaya qoyur.