İsveçrənin Cenevrə şəhərində keçirilən BMT-nin İnsan Hüquqları Şurasının 55-ci sessiyasının birinci günü - fevralın 26-da tədbirə onlayn qatıldım. Sessiya çərçivəsində “İnsan hüquqlarının tətbiqi” mövzusunda panel müzakirələrdə ilk dəfə olaraq “Əlilliyin olan şəxslərin iştirakçılığı və inklüzivliyi” məsələsi gündəmə gətirildi. Prosedura uyğun olaraq müzakirələrdə QHT nümayəndələrinə danışmaq üçün söz verilir. Mən Azərbaycanın ərazilərində basdırılmış mina və digər silah-sursatın partlayışı nəticəsində mülki insanların həlak və əlil olduqlarını diqqətə çatdırdım. Bildirdim ki, mina nəticəsində əlil olan vətəndaşlarımızın hüquqları müdafiə edilməli və mina terroruna son qoyulmalıdır.

Çıxışımda vurğuladım ki, Ermənistanın Azərbaycana qarşı həyata keçirdiyi mina terroru əlil olan insanların sayının artmasına gətirib çıxarmaqla bərabər, keçmiş məcburi köçkünlərin öz ata-baba torpaqlarına qayıdış prosesinə də maneçilik törədir.

Minaların təmizlənməsi məsələsində beynəlxalq dəstəyin vacibliyini xüsusilə diqqətə çatdırdım. Mənim mina terroru ilə bağlı çıxışım BMT-nin rəsmi saytında da yerləşdiriləcək. Bu da o deməkdir ki, istənilən ölkə, istənilən təşkilat Azərbaycanda mina problemi barədə ətraflı məlumat almış olacaq.

Fact-info.az-ın məlumatına görə,  bu fikirləri AZƏRTAC-a açıqlamasında Hüquqi Təhlil və Araşdırmalar İctimai Birliyinin sədri Ramil İskəndərli söyləyib.

QHT sədri 6 həftə davam edəcək beynəlxalq tədbirdə dövlət və hökumət rəsmiləri ilə bərabər, BMT-nin funksionerləri, komitə və qurum rəhbərləri, beynəlxalq təşkilatlar, həmçinin qeyri-hökumət təşkilatlarının nümayəndələrinin də iştirak etdiklərini bildirib: “QHT-lər arasında bu qəbildən olan görüşlərdə BMT-nin İqtisadi və Sosial Şurasının ümumi və məsləhət statuslu üzvlərinin iştirak etmək hüququ vardır. Hüquqi Təhlil və Araşdırmalar İctimai Birliyi bu statusu 2023-cü ilin dekabr ayında qazanıb. Birliyimizin bu statusa uyğun olaraq, BMT və onun qurumları çərçivəsində keçirilən tədbirlərdə iştirak etmək hüququ vardır”.

Hüquqi Təhlil və Araşdırmalar İctimai Birliyinin sədri gələn həftədən 55-ci sessiyanın iclasında birbaşa iştirak edəcəyini, mötəbər tədbirdə Azərbaycan həqiqətlərinin dünyaya çatdırılması, xalqımızı narahat edən problem barədə tədbirdə təmsil olunan rəsmiləri, beynəlxalq təşkilatları, vətəndaş cəmiyyəti təşkilatlarını ətraflı məlumatlandıracağını bildirib.

“Məndən sonra bəzi lider ölkələrin nümayəndələri çıxış etdilər. Çıxışımdan təsirlənən digər natiqlər də mina terroru nəticəsində əlil olan insanların taleyi ilə bağlı narahatlıqlarını dilə gətirdilər. Düşünürəm ki, mina terroru ilə bağlı Azərbaycan QHT nümayəndəsinin çıxışı altı həftə davam edəcək sessiyanın gedişinə öz təsirini göstərəcək. Bu təsirin qəbul olunmuş qərar və sənədlərdə öz əksini tapacağına şübhə etmirəm”, - deyə Ramil İskəndərli vurğulayıb.