Fact-info.az-ın  məlumatına görə, bunu AZƏRTAC-a açıqlamasında ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov antiterror tədbirlərinin necə və hansı şəraitdə aparılmasını şərh edərkən deyib.

O bildirib ki, antiterror tədbirləri ağır relyef, düşmən tərəfindən uzun illər böyük mühəndislik işləri nəticəsində istehkamların mövcudluğu, mövqelərinin təpələrdə, əlverişli yerlərdə yerləşdirilməsi şəraitində aparıldı. Hərbçilərimiz böyük qəhrəmanlıq, şücaət, peşəkarlıq göstərərək Azərbaycan Silahlı Qüvvələrinin XXI əsr hərbi əməliyyatlar nümunəsini ortaya qoydu. Qırx dörd günlük müharibədən sonra Azərbaycan Ordusunun döyüş qabiliyyəti daha da yüksəldi. Beləliklə, ən müasir standartlara cavab verən peşəkar ordu formalaşdı və onun qarşısına qoyulmuş bütün vəzifələri yerinə yetirmək bacarığına malik oldu.

Hərbi ekspertin sözlərinə görə, antiterror tədbirlərində prioritet məsələlərdən biri də mülki əhalinin və yaşayış məntəqələrinin təhlükəsizliyi idi. Bununla bağlı Ordumuzda məhz yaşayış məntəqələrinə yaxın, hətta orada olan legitim hədəflərə dəqiq atəşlə zərbə vura biləcək xüsusi təyinatlı vasitələr ayrılmışdı. Ona görə döyüşlərin birinci mərhələsi məhz atəş hücumundan başlayıb. Bu zamanı bütün legitim hədəflər məhv edilib, qarşı tərəfin müqaviməti qırılıb. Antiterror tədbirləri zamanı dinc əhali və yaşayış məntəqələri zərər çəkməyib. Bu da bir daha Azərbaycan Ordusunun peşəkarlığının göstəricisidir. Qanunsuz silahlılar, terrorçular öz mövqelərini tərk edib və orada yaşayan mülki erməni vətəndaşların dəstəyindən də məhrum olub.

Polkovnik qeyd edib ki, antiterror tədbirlərin əsas məqsədi reinteqrasiya prosesini praktiki şəkildə həyata keçirmək üçün şərait yaratmaq idi. Bunun nəticəsi olaraq sentyabrın 21-də Yevlax şəhərində Qarabağın erməni sakinləri ilə təmaslar üzrə müəyyən edilmiş məsul şəxs Qarabağın erməni sakinlərinin təmsilçiləri ilə görüşüb. Konstruktiv və müsbət mühitdə keçən görüşdə Azərbaycan Respublikasının Konstitusiyası və qanunları əsasında Qarabağın erməni əhalisinin reinteqrasiyası, infrastrukturunun bərpası və fəaliyyətinin təşkil olunması məsələləri üzrə müzakirələr aparılıb. Həmçinin Azərbaycan Respublikası Müdafiə Nazirliyinin antiterror tədbirlərinin dayandırılması üzrə 20 sentyabr tarixli bəyanatında əks olunmuş məsələlərin tezliklə icrasının vacibliyi vurğulanıb. Beləliklə, görüşdə Azərbaycanın maraqları tam təmin olundu.

“Digərə tərəfdən erməni cəmiyyəti də artıq bu vəziyyətdən özü yorulub. Dövlətimizin başçısının dediyi kimi, ermənilər Qarabağ iqtisadi rayonunda yaşayan, oradakı silahlıların girovuna çevrilib və azad edilmiş cəmiyyət bundan sonra reinteqrasiya proseslərinin həyata keçirilməsi üçün səylər göstərəcək. Onlar Azərbaycan cəmiyyəti ilə birlikdə reinteqrasiya istiqamətində addımlar ataraq prosesin davam etməsi üçün şərait yaradacaqlar.

Düşünürəm ki, Azərbaycan Ordusunun antiterror tədbirlərinin ilk günündə göstərdiyi şücaət, qəhrəmanlıq və iradə, eləcə də “Dəmir yumruq” nəticəsində 2020-ci il 10 noyabr tarixli üçtərəfli Bəyanatın dördüncü bəndi yerinə yetirildi. Bununla da reinteqrasiya prosesinin reallaşdırılması üçün və görüşlə bağlı erməni tərəfinin müraciət etməsinə nail olunaraq həmin prosesə başlanıldı. Həmçinin Azərbaycan Prezidenti İlham Əliyevin tapşırığı ilə Qarabağ bölgəsində sosial, humanitar, iqtisadi və infrastruktur məsələlərinin həlli məqsədilə Baş nazirin müavini Şahin Mustafayevin rəhbərliyi ilə İşçi qrup yaradıldı”, - deyə hərbi ekspert fikrini yekunlaşdırıb.