Fact-info.az xəbər verir ki,  bunu AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva söyləyib.

Qoşulmama Hərəkatının Azərbaycana, Azərbaycanın isə bu təşkilata verdiyi töhfələr barədə danışan Q.Paşayeva deyib: “Qoşulmama Hərəkatına üzv olan ölkələr Ermənistanın Azərbaycan torpaqlarını işğalı dövründə, eləcə də 44 günlük Vətən müharibəsinin gedişində və postmüharibə dönəmində bizim ədalətli mövqeyimizi dəstəkləyib. Həmin ölkələr BMT Təhlükəsizlik Şurasında Azərbaycan əleyhinə olan birtərəfli və qərəzli bəyanatların qəbul edilməsinə mane olublar.

Azərbaycanın Qoşulmama Hərəkatına sədrlik etdiyi dövrü bu beynəlxalq platformanın “qızıl” dönəmi kimi qiymətləndirmək mümkündür. QH-nin institusional inkişafı baxımından da, beynəlxalq aləmdə nüfuzunu yüksəltmək baxımından da önəmli məsafə qət edib. Ayrıca, Azərbaycan Respublikası COVID-19 pandemiyası vaxtı QH-nin bir sıra üzvlərinə yardımlar göstərib. Bu yardımlar həm birbaşa, həm də Ümumdünya Səhiyyə Təşkilatının xətti ilə baş tutub”.

Komitə sədri bildirib ki, əgər Azərbaycan Vətən müharibəsində tarixi Zəfərə imza atmasaydı, bölgəmiz, tərəfdaş ölkələr xeyli çətin vəziyyətdə qalmalı olacaqdı. Azərbaycanın yaratdığı yeni reallıqlar həm regionda, həm də dünyada müsbət təsirə malikdir.

Zəngəzur dəhlizinin əhəmiyyətindən danışan Q.Paşayeva bildirib ki, Bandunq prinsiplərinə əsaslanan fəaliyyətlə Azərbaycan-Qoşulmama Hərəkatı qarşılıqlı əlaqələri, ölkəmizin Hərəkata, Hərəkatın isə ölkəmizə töhfələri daha böyük perspektivlər vəd edir. Mürəkkəb dünyamızda Qoşulmama Hərəkatının rolunun artması bəşəri maraqlara cavab verir.

Azərbaycanın neokolonializm meyillərinin artmasından son dərəcə narahat olduğunu vurğulayan komitə sədri deyib: “Prezident İlham Əliyevin qeyd etdiyi kimi, Qoşulmama Hərəkatı keçmişin belə hallarına qarşı qətiyyətlə mübarizə aparmalı və onun tamamilə aradan qaldırılmasına öz töhfəsini verməlidir. Neokolonializmi hələ də davam etdirən ölkələrdən biri olan Fransa və onun kimi dövlətlər beynəlxalq çağırışlara cavab verməlidir. Bu deyilənlər Fransanın və daha dörd böyük ölkənin daimi üzv olduğu BMT Təhlükəsizlik Şurasının yenidən formalaşmasının zəruriliyini özündə ifadə edir. Özü müstəmləkəçi olan ölkələr haqqı, ədaləti necə təmin edə və sülhdən danışa bilərlər. Bir faktı deyək ki, Fransanın soyqırımları ilə dolu hakimiyyəti dövründə 1,5 milyona yaxın əlcəzairli qətlə yetirilib. Hələ də Paris muzeyində əlcəzairli azadlıq döyüşçülərinin kəllə sümükləri müharibə qənimətləri kimi saxlanılır. Bu, utancvericidir. Bu yaxınlarda Əlcəzair əsilli 17 yaşlı yeniyetmənin Fransa polisi tərəfindən qətlə yetirilməsi də Makron Fransasının mahiyyətini əyani şəkildə göstərir”.

Q.Paşayeva təəssüflə bildirib ki, özünü yalandan insan haqlarının və beynəlxalq hüququn müdafiəçisi kimi qələmə verən Fransa hələ də digər ölkələrin daxili işlərinə qarışır. Fransa qoşunlarının bu yaxınlarda Mali və Burkina-Fasodan çıxarılması onun Afrikadakı amansız neokolonializm siyasətinin uğursuzluğa məhkum olduğunu bir daha göstərdi.

“Fransa müstəmləkəçilik siyasətini indi də davam etdirir. O, bununla başqa dövlətləri təsiri altına salmağa çalışır. Azərbaycan Prezidenti bu barədə Qoşulmama Hərəkatının tribunasından danışdı, faktlarla Fransanın çirkin siyasət yürütdüyünü dünyaya bəyan etdi. Dövlətimizin başçısı müstəmləkəçi ölkə olan Fransanın Qarabağda erməni separatizmini dəstəklədiyini bildirərək, öz mənfur siyasətini Cənubi Qafqaz regionunda da tətbiq etmək arzusunda olduğunu diqqətə çatdırdı. Azərbaycan Prezidenti Ermənistana və onu dəstəkləyən qüvvələrə bir daha xəbərdarlıq etdi”, - deyən Qənirə Paşayeva fikirlərini yekunlaşdırıb.