Bu gün Azərbaycana qarşı müxtəlif çirkin kampaniyalar həyata keçirən, Qələbəmizi və əldə etdiyimiz uğurları həzm edə bilməyən qüvvələrin sayı kifayət qədərdir. Onlar öz imperialist maraqlarını təmin etmək üçün müxtəlif vasitələrə əl atır, neomüstəmləkəçi təfəkkürü və düşüncəsi ilə Cənubi Qafqazda üstün mövqelərə yiyələnmək məqsədi güdürlər. Afrikada, Cənubi Amerikada, Asiyanın müxtəlif bölgələrində təbii ehtiyatları və mineral resursları vandalcasına istismar edən qüvvələr indi də regionumuza yönələrək burada iqtisadi maraqlar əldə etməyə səy göstərir, siyasi proseslərə qoşularaq nüfuz dairələrini genişləndirmək üçün çalışırlar. Son illər özünü aydın şəkildə göstərən azərbaycanofobiya, türkofobiya, islamofobiya onların geosiyasi baxışlarında əsas yerə malikdir. Bütün bunlar isə Azərbaycan tərəfindən qəbuledilməz məsələlər olduğu üçün rədd edilir, ölkəmiz buna qarşı qəti iradə və mövqe ortaya qoyur.

Fact-info.az xəbər verir ki, bu fikirləri AZƏRTAC-a açıqlamasında politoloq İlyas Hüseynov söyləyib.

Fransa dövlətinin əlindəki bütün imkanlardan Azərbaycana qarşı istifadə etdiyini vurğulayan politoloq deyib: “Fransa, eyni zamanda, BMT Təhlükəsizlik Şurasında, Avropa İttifaqında, Avropa Şurasında, Frankofoniya Təşkilatında və digər institutlarda təsir imkanlarını işə salıb. Bu təşkilatlar nə qədər humanitar, mədəni qurumlar olsa da, orada müzakirələr Ermənistanın xeyrinə aparılır və Azərbaycanı qınaq obyektinə çevirməyə çalışırlar. Bununla yanaşı, Fransa özünün təsir dairəsində olan ölkələrə təzyiq edir ki, ölkəmizə qarşı qarayaxma kampaniya aparsın. Kanada, Benilüks ölkələri də məhz belə qüvvələrdəndir ki, erməni sevgisini aydın şəkildə bəyan edir.

Digər tərəfdən Azərbaycan da Fransanın ölkəmizə qarşı ikili standartlar mövqeyinə müqavimətini ortaya qoyur, onların istismarçı və yırtıcı mahiyyətini üzə çıxarır. Fransa müstəmləkəçiliyinə mübarizəyə dəstək məqsədilə yaradılan Bakı Təşəbbüs Qrupu da bu ölkənin törətdiyi soyqırımlarını, qətlimları, ümumilikdə cinayətlərini, uzun illər ərzində Parisin təsiri altında olan bölgələrdə aclıq və səfalət hökm sürdüyünü geniş ictimaiyyətə təqdim edir, beynəlxalq müstəvidə müzakirəyə çıxarır”.

İ.Hüseynovun sözlərinə görə, Azərbaycana qarşı nə qədər çirkin qarayaxma kampaniyaları aparılacaqsa, ölkəmiz də prinsipiallıq, siyasi iradə və güclü müqavimət nümayiş etdirəcək. Bizim mövqeyimiz Fransa müstəmləkəçiliyindən əziyyət çəkən dövlətlər üçün önəmlidir. Ona görə də Fransa öz geosiyasi maraqlarına və Cənubi Qafqazda möhkəmlənmək niyyəti ilə ölkəmizə qarşı apardığı məkrli siyasətinə son qoymalıdır.