Ermənistanın hərbi təcavüzü nəticəsində 30 ildən artıq doğma evlərindən didərgin düşən soydaşlarımız  bütün arzu və duyğularını ifadə edərək tarixi qələbəmizdən sonra öz yurdlarına qayıdırlar. Qayıdış  prosesi Azərbaycanın tarixi nailiyyətidir. Bu qələbəni, böyük uğurları bizə yaşadan Qarabağın fatehi, Ali Baş Komandan İlham Əliyevdir. Azərbaycanın tarixində ilk dəfə olaraq bütün suveren ərazilərimizdə seçkilər keçirilir. Bu gün həmin tarixi nailiyyəti dərk edirik, məhz ona görə, bu qələbəni bizə yaşadan liderə səs verəcəyik. Biz  millət olaraq uzun illər suveren, müstəqil, bütün ərazilərimizin azad olunması istəyində olmuşuq. Bu yolda Prezident İlham Əliyevin rəhbərliyi və düşünülmüş siyasəti nəticəsində çətin mübarizədən sonra qələbə qazandıq.

 Dövlət başçımızın heyrətamiz dərəcədə müdrik qərarları sayəsində ötən il  Qarabağdakı ermənipərəst separatçı qurum təslim oldu, hətta uzunmüddətli qarşıdurma imkanları belə aradan qaldırıldı.  Bu gün çox qürur hissilə qələbəmizi, bu tarixi anları yaşayırıq. Azərbaycanın hər bir məkanında bayrağımız dalğalanır.  Gerçəkdən böyük uğurdur işğaldan azad olunmuş bütün məkanlarda bayrağımız dalğalanır və belə tarixi məqamlara, seçki prosesinə şahidlik edirik. Bu gün biz vətəndaş olaraq əminik ki, bu seçki Azərbaycanın tarixində, demokratik ənənələrin möhkəmlənməsində əhəmiyyətli məqamdır.  

 Onu qeyd edim ki, Azərbaycan Qarabağda tarixi qələbə qazanmaqla, işğaldan azad olunmuş ərazilərə keçmiş məcburi köçkünləri köçürməklə  bərabər  beynəlxalq  proseslərdə öz sözünü deyir.  Prezident İlham Əliyev    milli maraqlarımızı əsas tutaraq çox düzgün, balanslaşdırılmış  siyasət həyata keçirərək, mürəkkəb coğrafiyada uğurlarımızı, qələbəmizi təmin edib. Azərbaycan öz maraqlarını məharətlə qoruyur və dünyanın böyük oyunçuları ilə qarşılıqlı fəaliyyət göstərir. Dünyanın iqtisadi-siyasi xəritəsinin müəyyən edilməsində həlledici faktorlardan biri olan nəhəng layihələrin gerçəkləşməsinə Azərbaycan öz töhfəsini verir. Belə tranzit layihələrdən yalnız region dövlətləri deyil, ümumilikdə  geniş coğrafiyada  iştirakçı ölkələr  faydalanacaq.

Təbii ki, biz bu uğurlu  prosesin davam edəcəyinə və qələbəmizin seçkidə bir daha təmin olunacağına əminik. Yekunda bu fikrimi bildirmək istəyirəm ki,  seçki  Azərbaycanımız, xalqımız, millətimiz və dövlətimiz üçün xeyirli-uğurlu olsun!

 Azərbaycan Tibb Universitetinin professoru 

Surəddin Zeynalov