25 dekabr 2023-cü il tarixində Türkiyənin Qazi Üniversitetinin akt zalında Türk Akademiyası tərəfindən aparılmış  “Türk Barometr 2023: türk dövlətlərində milli kimlik və mədəni əlaqələr” adlı elmi- sosioloji tədqiqatın nəticələri ilə bağlı təqdimat mərasimi keçirilib.

Fact-info.az xəbər verir ki, Türk dövlətlərində 6341 respondent ilə həyata keçirilən tədqiqat Azərbaycan, Qazaxıstan, Qırğızıstan, Özbəkistan və Türkiyədə əhalinin əhəmiyyət verdiyi sosial və mədəni dəyərləri müəyyən etmək, həmçinin Türk xalqlarının bir-birinə yaxınlaşma ilə bağlı təsəvvürləri ortaya çıxarmaq məqsədi daşıyır. 

Türk Akademiyası və  Qazi Universiteti Türk Dünyası Araşdırma Mərkəzi (TÜRKDAM) tərəfindən birgə təşkil olunan tədbirdə Türk Akademiyasının prezidenti akademik Şahin Mustafayev, Türkiyə Cumhuriyəti Prezident aparatının sabiq baş katibi Prof.Dr. Mustafa İsen,  Qazi Universitetinin prorektoru Prof.Dr. Yücel Gelisli, ictimai elmlərin müxtəlif sahələrindən olan elm adamları iştirak etdilər.

Tədbirin açılış nitqini söyləyən Türk Akademiyasının prezidenti  akademik Şahin Mustafayev aparılmış elmi-sosioloji tədqiqatın türk dövlətləri arasında mövcud münasibətlərlə bağlı təsəvvürləri və gözləntilərinin aşkara çıxarılmasında vacib əhəmiyyət kəsb etdiyini bildirdi. Həmçinin Ş.Mustafayev xüsusilə qlobal proseslər müstəvisində və türk dövlətlərinin getdikcə bir-birinə daha da yaxınlaşma şəraitində bu cür elmi tədqiqatların keçirilməsinin vacib olduğunu qeyd etdi. Tədbirin açılış hissəsində çıxış edən Türkiyə Cumhuriyəti Prezident aparatının sabiq baş katibi Prof.Dr. Mustafa İsen,  müasir dövrdə Türk dövlətlərində ortaq dəyərlərin bu cür elmi-sosioloji tədqiqatlarla müəyyən olunmasının Türk dünyasında milli-mənəvi dəyərlərin qorunması və yaşadılması baxımından mühüm əhəmiyyət kəsb etdiyini qeyd etdi. Qazi Universitetinin prorektoru Prof.Dr. Yücel Gelisli isə öz çıxışında  elm adamlarının ortaq səyləri nəticəsində ərsəyə gələn bu tədqiqatın Türk dövlətləri arasında elm və təhsil sahəsində də əməkdaşlığın uğurla həyata keçirildiyinin bariz  nümunəsi olduğunu söylədi.

Çıxışlardan sonra Türk Akademiyası tərəfindən həyata keçirilən “Türk Barometr 2023: türk dövlətlərində milli kimlik və mədəni əlaqələr” adlı elmi- sosioloji tədqiqatın nəticələri tədbir iştirakçılarına təqdim olundu. Təqdimatın ardından elmi-sosioloji tədqiqatın nəticələrinin elm adamları tərəfindən müzakirəsi keçirildi.