Separatçıların İrəvanda yığılıb qondarma "Arçax"ı diriltmək cəhdləri bəzi dairələrin məkrli planlarıdır. Belə təxribatçı addımların heç bir bir gələcəyi olmasa da, sülh prosesinə əngəl yaratmaq, nisbi sabitliyi pozmaq cəhdidir. Digər tərəfdən belə məkrli addımlar Azərbaycana gələcəkdə təzyiq alətləri kimi də istifadə oluna bilər.

Ermənilərin çox uğursuz ənənəvi təcrübəsi var. Bu da ondan ibarət olub ki, 100 ildən artıqdər ki, qondarma soyqırım iddiaları ilə Türkiyəyə qarşı mübarizə aparıblar. Uydurmalara əsaslanan saysız-hesabsız kitablar nəşr olunub, məqalələr yazılıb. Bəzi dairələrin diktəsilə görülən bu işlərin əsas məqsədi qondarma erməni soyqırımı iddiası ilə Türkiyəyə təzyiq göstərmək olub. Amma bütün saxta antitürk təbliğatı heç bir effekt vermədi. Çünki ortada həqiqət yoxdur.

Böyük ehtimalla separatçıların qondarma "Arçax"ı diriltmək cəhdləri mütəmadi olaraq baş verəcək. Əgər erməni separatçıları havadarlarının təhriki ilə yanlış addım atarlarsa bədəlini ağır ödəyəcəklər. Qərbi Azərbaycandan müxtəlif dönəmlərdə qovulmuş yüzminlərlə azərbaycanlıların mühacirət hökumətinin yaradılması, onların parlamentinin formalaşması və digər zəruri işlərin görülməsi gündəmə gələ bilər. Bütün bu məqamları, erməni separatizminin törədəcəyi fəsadları Ermənistanın rəhbərliyi yəqinki dərk edir.

Mən, ümumiyyətlə, erməni separatizminin yaxın illərdə baş qaldıracağına inanmıram. Çünki Odumuz istər 44 günlük müharibədə, istərsə də 24 saatlıq 19 sentyabr antiterror tədbirləri zamanı düşmənə Azərbaycanın gücünü göstərib. Bu əslində çoxlarına dərs olmalıdır. Cənubi Qafqazda sülh və sabitlik üçün separatizm deyil, normal əməkdaşlıq, sivil münasibətlər lazımdır.

Əkrəm Bəydəmirli