Azərbaycanın İsveç Krallığındakı səfiri Zaur Əhmədov bu ölkənin “Diplomaticworld Sweden” portalına müsahibə verib.

Fact-info.az xəbər verir ki, səfir 2024-cü ildə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına ev sahibliyi edəcək və Avropa ilə Asiyanın qovşağında körpü rolunu oynayan ölkəmizin bu mötəbər beynəlxalq tədbiri yüksək səviyyədə keçirmək əzmində olduğunu bildirib.

Müsahibədə Prezident İlham Əliyevin sədrliyi ilə COP29-a ilk hazırlıq iclası haqda məlumat verilib, Azərbaycanın müstəqil siyasəti, beynəlxalq hüquq normalarına hörmətin beynəlxalq müstəvidə daima təşviq edilməsi və indiyədək Beynəlxalq Astronavtika Konqresi də daxil olmaqla bir çox vacib beynəlxalq tədbirlərin yüksək səviyyədə və uğurla təşkilinin beynəlxalq ictimaiyyətin ölkəmizə böyük etimadını şərtləndirən amillər sırasında olduğu vurğulayıb.

Habelə, neft və qazla zəngin ölkə olan Azərbaycanın 2030-cu ilə qədər öz enerjisinin 30 faizini bərpa olunan mənbələrdən əldə etmək məqsədinə çatmasını təmin edəcək yaşıl enerji təşəbbüslərini və yaşıl keçidi inkişaf etdirmək üçün atdığı addımlar barədə məlumat verilib.

Səfir COP29-un Bakıda keçirilməsi barədə qərarın ikitərəfli danışıqlar nəticəsində normallaşma istiqamətində Azərbaycan və Ermənistanın birgə atdığı addımlar fonunda baş tutduğuna diqqəti yönəldərək, iqlim dəyişikliyi probleminin beynəlxalq səylərlə vaxtında həlli üçün regional tərəfdaşlıq və davamlı sülhün vacibliyini də vurğulayıb.