Beynəlxalq müsabiqələr laureatı, Rəssamlar İttifaqının üzvü, ölkəmizin gənc rəssamlarıdan biri Nərgiz Quliyeva təsviri sənət sevərləri qarşısına yeni sərgisi ilə gəlir.

Bu barədə  Fact-info.az-a Muzey Mərkəzindən məlumat verilib.

Bildirilib ki, dekabrın 1-5-də Mədəniyyət Nazirliyi və Milli Məclisin Mədəniyyət komitəsinin təşkilatı dəstəyi ilə Muzey Mərkəzinin Sərgi Salonunda gerçəkləşəcək “Rənglərdə yaşayan ömür” fərdi sərgisi Nərgiz Quliyevanın Azərbaycanda keçiriləcək sayca üçüncü ekspozisiyasıdır.

Ölkə daxilindəki aktiv fəaliyyəti ilə yanaşı, Nərgiz Quliyevanın dünya ölkələrindəki çoxsaylı layihələri də hər zaman diqqət cəlb edib. Parisin Luvr, Dubay Art Fair, İstanbulda “NishArt”, Vyanada Azərbaycan Mədəniyyət Mərkəzi və “Alma Gallery”, Macarıstanda Türksoy Həftəsi (Petöfinin 200-lik yubileyi), Mədəniyyət Nazirliyinin Şuşada keçirdiyi Art Camp, Heydər Əliyev Fondunun təşkilatçılığı ilə Almaniyanın mötəbər salonlarda keçirilən sərgilərdə uğurlu iştirakı xüsusi diqqət çəkib.

Rəhbəri olduğu “Nargiz Art Studio”nun Macarıstan və Mərakeş səfirlikləri ilə birlikdə keçirdiyi müsabiqə-sərgilər də son dövrlərin önəmli yaradıcı hadisələri kimi yadda qalıb.

Fərdi sərgi bu ilin əsas əlamətdar tarixi kimi qeyd edilən Azərbaycanın Ümummilli lideri Heydər Əliyevin 100 illiyinə həsr olunub. Milli Məclisin Mədəniyyət komitəsinin keçmiş sədri Qənirə Paşayevanın təşəbbüsü və ideyalarından ilhamlanaraq keçirilən sərgidə onun vətənpərvər ruhlu düşüncələrinin əks-sədası duyulmaqdadır.

Sərgidə Nərgiz Quliyevanın son illərdə Ulu Öndərin həyat və fəaliyyətdən ilhamlanaraq yaratdığı yeni əsərlərin təqdimatı ilə yanaşı, “Nargiz Art Studio”da təhsil alan yeniyetmə və gənc rəssamların 40-a yaxın əsərinin nümayişi də nəzərdə tutulub