ABŞ Dövlət Departamentinin Azərbaycanla bağlı məlum 907-ci maddəyə düzəlişi qüvvədə saxlaması ədalətsizlikdir. Düzdür, Azərbaycan ilə Ermənistan arasında sülh müqaviləsinin imzalanması üçün ABŞ-ın səylərini qeyd etmək lazımdır. Lakin, indi regionda sülhə bu qədər yaxın olduğumuz bir vaxtda 907-ci düzəlişin ləğv olunmaması, bəzi region ölkələrinə silah verilməsi təəssüf və narahatlıq doğurur. Əgər ABŞ və Avropa İttifaqı sülh istəyirlərsə, regionun heç bir ölkəsinə, xüsusən də Ermənistana silah verilməməlidir.

Fact-info.az-ın məlumatına görə, bu sözləri AZƏRTAC-a müsahibəsində gürcü politoloq Tengiz Txilava söyləyib.

Onun sözlərinə görə, Fransa başda olmaqla, Aİ-nin silah satışı ilə bağlı embarqosu Ermənistana da şamil edilməlidir. Bu halda verilən qərar ədalətli olardı.

Politoloq hesab edir ki, Azərbaycan Amerika silahı olmasa belə, nəsə itirməcəyək. Silahın haradan alınması üçün bir mənbə tapılacaq. Amma bu cür addımlar, heç də xoş deyil və ədalətsizdir.

T.Txilava deyib: “Azərbaycan başqa ölkənin ərazisinə göz tikmir, öz ərazi bütövlüyünü bərpa edib. Azərbaycan Prezidenti İlham Əliyev də dəfələrlə bəyan edib ki, heç bir ölkənin ərazisinə iddiası yoxdur”.

“Azərbaycanın Qazax rayonunun bəzi kəndləri hələ də işğal altındadır. Mən bu yaxınlarda Qazaxda olmuşam. Həmin kəndləri uzaqdan görmüşəm. Düşünürəm ki, Azərbaycanın səbrini yenə sinamaq lazım deyil. Qarabağda olanlar burada da ola bilər. Bir günə hər şey həllini tapacaq və sülh bərqərar olacaq. Əgər Ermənistan sülh istəyirsə, onda müqaviləni imzalayıb, həmin kəndləri də geri qaytarmalıdır”, – deyə Txilava vurğulayıb.