FACT-INFO.AZ » AKTUAL » Birinci xanım Mehriban Əliyevanın “Fələstin üçün tək ürək” toplantısının iştirakçılarına müraciəti - VİDEO
16-11-2023, 07:00 | AKTUAL
Birinci xanım Mehriban Əliyevanın “Fələstin üçün tək ürək” toplantısının iştirakçılarına müraciəti - VİDEO

Azərbaycan Respublikasının Birinci xanımı Mehriban Əliyevanın noyabrın 15-də İstanbulda keçirilən dövlət və hökumət başçılarının xanımlarının “Fələstin üçün tək ürək” toplantısının iştirakçılarına müraciəti olub.

Fact-info.az Birinci xanım Mehriban Əliyevanın müraciətini təqdim edir.

- Hörmətli Əminə xanım,

Hörmətli toplantı iştirakçıları,

İlk növbədə, Türkiyə Respublikasının Birinci xanımı, hörmətli Əminə Ərdoğana bu tədbirdə iştirak etmək üçün dəvətinə görə dərin təşəkkürümü bildirirəm.

Hörmətli Əminə xanımın humanitar və sosial sahələrdə fəaliyyətini, o cümlədən hərbi münaqişələrdən əziyyət çəkən mülki şəxslərə, qadınlara və uşaqlara yardım göstərilməsi məsələlərinə verdiyi töhfəni xüsusi qeyd edir və bunu yüksək qiymətləndirirəm.

Bu il yaranmasının 100-cü ildönümünü qeyd edən Türkiyə Respublikası bütün sahələrdə mühüm nailiyyətlər əldə etmiş, beynəlxalq aləmdə böyük nüfuza malik qüdrətli dövlətdir. Qardaş Türkiyə daim sülhün və ədalətin yanında olaraq bölgədə və dünyada sabitliyin və təhlükəsizliyin təmin olunmasına önəmli töhfə verir. Azərbaycan-Türkiyə qardaşlığı və birliyi bu gün özünün ən yüksək səviyyəsindədir.

Hörmətli toplantı iştirakçıları,

İsrail-Fələstin münaqişə zonasında gərginliyin miqyasının gündən-günə genişlənməsi və daha böyük insan faciəsinə səbəb olması ciddi narahatlıq doğurur. Ürək ağrısı ilə izlədiyimiz dözülməz insan iztirabları hər birimizi dərindən sarsıdır. Bu silahlı qarşıdurmadan ən çox əziyyət çəkənlərin mülki şəxslər, xüsusilə də qadınlar və uşaqlar olması olduqca üzücüdür. Hərbi əməliyyatların aparılması zamanı beynəlxalq humanitar hüquqa riayət edilməsi zəruridir. Mən həlak olanların yaxınlarına başsağlığı verir, yaralananların tezliklə şəfa tapmasını diləyirəm.

Azərbaycan hərbi əməliyyatların dərhal dayandırılması ilə bağlı çağırışları dəstəkləyir və son gərginliklə əlaqədar oktyabr ayında BMT Baş Assambleyasında qəbul edilmiş qətnamənin lehinə səs vermişdir. Ölkəmiz beynəlxalq hüquqa və BMT-nin müvafiq qətnamələrinə uyğun olaraq, İsrail-Fələstin münaqişəsinin “iki dövlət” prinsipi əsasında həllinin tərəfdarıdır. 2019-cu ildən etibarən Qoşulmama Hərəkatına sədrliyimiz dövründə Fələstin məsələsinə daim diqqət ayırmışıq. İnanıram ki, bu il Ramallah şəhərində ölkəmizin Təmsilçilik Ofisinin fəaliyyətə başlaması Azərbaycan-Fələstin əlaqələrinin inkişafına təkan verəcəkdir.

Son on il ərzində ölkəmiz BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyi xətti ilə dəfələrlə humanitar və maliyyə yardımı göstərmişdir. Eyni zamanda, Azərbaycan Fələstinə siyasi və maliyyə dəstəyinin cəlb edilməsi məqsədilə bir sıra beynəlxalq tədbirlərə ev sahibliyi etmişdir. Bunların sırasında Fələstin Dövlətinə yardım məqsədilə İslam Maliyyə Təhlükəsizlik Şəbəkəsinin təsis konfransını və Qüds şəhərinin inkişafına dəstək məqsədilə donor konfransını qeyd etmək istərdim. Azərbaycan dövlətinin verdiyi təqaüd əsasında fələstinli gənclər ölkəmizdə ali təhsil alırlar. Azərbaycan tərəfindən Fələstində inşa ediləcək məktəb Fələstin xalqına dəstəyimizin növbəti təzahürü olacaqdır.

Geniş səlahiyyətlərə malik beynəlxalq təsisatların üzləşdiyi hazırkı böhran vacib məsələlərin həllini əngəlləyir. Dərin kökləri olan bu böhran başqa bir müzakirə mövzusudur. Qeyd etmək istəyirəm ki, müasir dövrdə hərbi münaqişələrin həll olunmaması böyük ölçüdə beynəlxalq hüququn selektiv şəkildə tətbiq olunmasından irəli gəlir. İkili standartlar və qərəzli yanaşma bu böhranın daha da kəskinləşməsinə şərait yaradır.

İctimai rəyin çaşdırılması və beynəlxalq hüququn manipulyasiyası üçün qərəzli media platformaları vasitəsilə yalan hekayələr yayılır. Bundan daha təhlükəlisi isə mənəvi dəyərlərdən manipulyasiya məqsədilə sui-istifadə olunması hallarıdır.

Ermənistanın Azərbaycana qarşı 30 il davam edən təcavüzü nəticəsində ərazilərimiz işğal olunmuş, bir milyona yaxın soydaşımız öz dədə-baba yurdlarından didərgin düşmüş, 300-dən artıq şəhər və kəndimiz darmadağın edilmiş, dini və mədəni irsimiz dağıdılmışdır. Vaxtilə işğal edilmiş torpaqlarımızda 67 məsciddən 65-i yerlə-yeksan edilmişdir.

Təəssüflə qeyd etmək istərdim ki, BMT Təhlükəsizlik Şurasının 1993-cü ildə qəbul etdiyi 4 qətnaməsi 27 il kağız üzərində qaldı. Azərbaycan 2020-ci ildə 44 günlük Vətən müharibəsində torpaqlarını özü işğaldan azad etdi və bu ilin sentyabr ayında antiterror əməliyyatı ilə Ermənistan silahlı qüvvələrinin qalıqlarının mövcudluğuna və separatizmə son qoyaraq suverenliyini tam bərpa etdi.

Çıxışımın sonunda vurğulamaq istərdim ki, ən çətin məqamlarda belə bəşəriyyət mərhəmət hissini itirməməlidir. Buna görə də, hörmətli Əminə xanıma bu vacib tədbiri təşkil etdiyinə və dəvətinə görə bir daha dərin minnətdarlığımı bildirirəm.




Baxış sayı: 120
Azərbaycan və Özbəkistan QHT-ləri arasında Anlaşma Memorandumu imzalandı Dünən, 17:30 Əlaqələndirmə Qərargahının iclası keçirilib Dünən, 16:00 Ermənistan Azərbaycanın 8 kəndini işğal altında saxlamasını ört-basdır etməyə çalışır Dünən, 15:00 ANAMA: "Beynəlxalq donorlar minatəmizləmə fəaliyyətinin yalnız 5 faizini maliyyələşdirir" Dünən, 11:30 Prezident: "ABŞ tərəfindən Azərbaycanla bağlı son bəyanatlar və atılan addımlar münasibətlərə ciddi zərər vurub" Dünən, 10:30 Xankəndidə Qarabağ Universiteti yaradılıb Dünən, 09:30 "Xəzər dənizi vasitəsilə Orta Dəhliz ölkələrinin ticarəti 60%-dən çox olacaq" Dünən, 09:30 “Nurlu sabaha” kitabı Dünən, 09:00 “Heydər Əliyev və Gürcüstan” kitabı Tbilisidə təqdim olunub 27-11-2023, 22:19 Azərbaycan-Gürcüstan-Türkiyə müdafiə nazirlərinin üçtərəfli görüşü olub, protokol imzalanıb 27-11-2023, 18:30 Yaşar Güler: Qarabağ əbədiyyətə qədər Azərbaycanın ərazisi olaraq qalacaq 27-11-2023, 18:30 Azərbaycan-Özbəkistan QHT-lərinin Əməkdaşlıq Forumu 27-11-2023, 15:30 Yuxularımın çin olduğu yer - Laçın 27-11-2023, 14:45 Azərbaycan tarixinin “qızıl 20 ili” və ya İlham Əliyev möcüzəsi 27-11-2023, 14:30 “Mədəni irs” mövzusunda forum keçiriləcək 27-11-2023, 10:00 Füzuli şəhərinə növbəti köç karvanı yola düşüb 27-11-2023, 08:30 Xaricdə “Azərbaycanın xalçaçılıq sənəti” adlı təqdimat keçirilib 27-11-2023, 07:00 Meksikada “Qarabağ xanlığı: Tarixi və mədəni kimlik” kitabının təqdimatı keçirilib 26-11-2023, 16:00 Rənglərdə yaşayan ömür 26-11-2023, 11:49 Şuşada "ASAN xidmət" Mərkəzi fəaliyyətə başlayacaq 26-11-2023, 10:00 Ermənistanın sülh müqaviləsini uzatması onu region ölkələrindən uzaqlaşdırır 26-11-2023, 09:30 Kəlbəcərlə Laçının elektrik şəbəkələrini birləşdirən təchizat sxemi yaradılacaq 26-11-2023, 08:30 Əsgərlərimiz Kəlbəcərdə şəhər gününü qeyd ediblər 25-11-2023, 20:00 Türk dünyası memarlarının Şuşa simpoziumu başa çatıb 25-11-2023, 18:30 Azərbaycan Ordusunda ictimai-siyasi hazırlıq məşğələləri keçirilir 25-11-2023, 10:30 SPECA-nın yubileyinə həsr olunmuş Zirvə görüşünə Gürcüstan mətbuatı da geniş yer ayırıb 25-11-2023, 10:30 “Ermənistan hökuməti azərbaycanlıların təhlükəsiz şəkildə və ləyaqətlə geri qayıtmasına şərait yaratmalıdır” 25-11-2023, 10:30 Memar Əcəminin 900 illik yubileyi UNESCO çərçivəsində qeyd olunacaq 25-11-2023, 10:30 "Könlüm keçir Qarabağdan..." 25-11-2023, 10:00 SPECA-nın Zirvə görüşünün Bakı Bəyannaməsi - Tam mətn 24-11-2023, 22:30
Köşə yazarları
Təqvim
«    Noyabr 2023    »
BeÇaÇCaCŞB
 12345
6789101112
13141516171819
20212223242526
27282930