Fransa dünyada mövcud olan geosiyasi vəziyyətdən istifadə edərək Qafqazda yeni gərginlik ocağı yaratmaq istəyir. Amma hamı başa düşməlidir ki, regionda güc Azərbaycanın tərəfindədir və Fransanın Ermənistana silah göndərməsi ilə qarşısına alacağı ölkə təkcə Azərbaycan deyil.

Fact-info.az-ın məlumatına görə,  bu sözləri AZƏRTAC-a müsahibəsində Gürcüstanın Yeni Xristian Demokratlar Partiyasının sədri, politoloq Levan Çixeidze söyləyib.

O qeyd edib ki, Fransa bu addımı ilə Rusiyaya, İrana və Türkiyəyə də mesaj göndərmək istəyir. Bu səbəbdən də atılan addımı təkcə Azərbaycan-Ermənistan müstəvisindən yox, dünyada baş verən geosiyasi proseslər fonunda digər ölkələrə olan münasibətlər aspektindən nəzərdən keçirmək lazımdır.

Ekspert bildirib: “Fransa elə dövlət deyil ki, kimə gəldi silah satsın. Burada təkcə iqtisadi yox, həm də siyasi layihələrdən söhbət gedir. İlk növbədə, bizi bu məsələ maraqlandırmalıdır. Qarabağ münaqişəsinin bitdiyi, Gürcüstanın isə sülh müqaviləsinin imzalanacağı yer olacağının açıqlandığı bir vaxtda Fransa niyə bizim regionda yerləşən ölkəyə silah satır? Təbii ki, bunun bir cavabı var, o da regionda sabitliyi pozmaq və yeni münaqişə ocaqları yaratmaq niyyətidir”.

Fransa buna nail ola bilməyəcəyinə, Azərbaycanın və Gürcüstan dünyaya sülh nümunəsi kimi çıxış etdiklərini vurğulayan politoloq qeyd edib: “İnanmıram ki, təməli prezidentlər Heydər Əliyev və Eduard Şevardnadze tərəfindən qoyulan dostluq və qardaşlıq əlaqələrini kimsə poza bilər. Çünki nəinki bizim ölkələrin, hətta bütün Qafqazın sabitliyi bu əlaqələrə əsaslanır. Qafqaz hazırda Şərqlə Qərbi birləşdirən əsas dəhlizlərdən sayılır. Buna görə də bir çox ölkələr burada güc sahibi olmaq üçün əllərindən gələni edir. Çünki münaqişələrin hökm sürdüyü zonaları idarə etmək daha rahat olur. Qərb Ermənistanı alət olaraq istifadə etmək istəyir. Əgər Ermənistan inkişaf etmək istəyirsə, tezliklə Azərbaycanla sülh müqaviləsini imzalamalı, heç bir təxribata əl atmamalıdır”.