Özbəkistan Dövlət Sənət və Mədəniyyət İnstitutu Özbəkistandakı Heydər Əliyev adına Azərbaycan Mədəniyyət Mərkəzinin dəstəyi ilə böyük Azərbaycan bəstəkarı, Şərqdə ilk operanın müəllifi Üzeyir Hacıbəylinin məşhur “Arşın mal alan” operettasını İnstitutun Teatr binasında özbək dilində səhnəyə qoyub.

Fact-info.az xəbər verir ki, Şərq ruhunda həyat tərzini parlaq şəkildə əks etdirən bu musiqili komediyasını Özbəkistan Dövlət Sənət və Mədəniyyət İnstitutunun Musiqi-teatr aktyorluğu kafedrasının rəhbəri, dosent Şerzod Məhəmmədiyev tərəfindən səhnələşdirilib və tamaşanı İnstitutun nəzdində xüsusi orkestr müşayiət edib.

Tədbirin sonunda çıxış edən Özbəkistan Dövlət Sənət və Mədəniyyət İnstitutun rektoru Eldor Şermanov dünya şöhrətli Azərbaycan bəstəkarının əsəri olan “Arşın mal alan” operettası haqqında danışıb, onun Özbəkistanda çox sevildiyini və daim maraqlı qarşılandığını qeyd edib. O vurğulayıb ki, “Arşın mal alan” əsəri dünyanın 75-dən çox dilinə tərcümə olunub, 76 ölkənin 187 teatrında tamaşaya qoyulub. Rektor Üzeyir Hacıbəylinin Azərbaycanın mədəniyyət beşiyi Şuşada dünyaya gəldiyini və bu şəhərin təkcə Azərbaycanın deyil, bütün Türk dünyasının mədəniyyət paytaxtı olduğunu vurğulayıb.

Özbəkistandakı Heydər Əliyev adına Azərbaycan Mədəniyyət Mərkəzinin məsləhətçisi Yusif Məmmədov çıxışında “Arşın mal alan” operettası üzərində xüsusi həvəslə çalışan aktyorlarının yüksək ifaçılıq səviyyəsini qeyd edərək, İnstitut rəhbərliyinə, habelə tamaşa rejissoruna öz təşəkkürünü bildirib. Y.Məmmədov qeyd edib ki, Azərbaycan Mədəniyyət Mərkəzinin dəstəyi ilə Özbəkistan səhnələrində artıq bir çox Azərbaycan tamaşaları nümayiş olunub və bu istiqamətdə işlər davam etdirilir. Natiq tamaşaçılar tərəfindən böyük alqışlarla qarşılanan “Arşın mal alan” əsərindəki süjetləri özlərinə doğma və yaxın kimi qəbul edilməsi xalqlarımızın bir-birinə yaxınlığının bir daha sübutu olduğunu söyləyib.