"Etnik diskriminasiya insan hüquqlarının kobud pozulmasından əlavə həm də faşizmdir və bu cəhətdən qəbuledilməzdir, çünki tarix boyu bu tendensiyalar çox böyük faciələrə gətirib çıxarıb". Bu sözləri açıqlamasında Hüquqi və Demokratik İslahatlar Mərkəzi İctimai Birliyin sədri İlham Əliyev deyib. Mərkəz rəhbəri qeyd edib ki, ermənilər arasında azərbaycanlılara qarşı yüz illərdir formalaşmış etnik nifrət soyqırıma səbəb olub.“Oktyabrın 30-da bizim də iştirak etdiyimiz, Sosial Təhqiqatlar Mərkəzinin (STM) və Azərbaycan Respublikasının insan hüquqları üzrə müvəkkilinin (ombudsman) birgə təşkilatçılığı ilə “Azərbaycanlılara qarşı nifrət cinayətləri və nifrət nitqi” hesabatının təqdimatı ilə bağlı konfransda da bu məqamlara toxunuldu. Konfransda “Azərbaycanlılara qarşı nifrət cinayətləri və nifrət nitqi” ilə bağlı videoçarx nümayiş olundu və çıxışçılar ermənilər tərəfindən inkişaf etdirilən etnik nifrət və faşizm ideologiyasına qarşı dünyanın sağlam qüvvələrini məlumatlandırmaq məqsədi ilə bir çox faktlar açıqladılar”.

İ.Əliyev bildirdi ki, bir millətin digərindən üstünlüyünü iddia edən ari irq iddiasının- faşist ideologiyasının tərkib hissəsi kimi dağıdıcı qüvvələrin əlində kütləvi qırğın aktlarına, qanlı terror əməllərinə və müharibələrə səbəb olur: “Çox təəssüf ki, bir sıra qərb dairələrində etnik və dini cəhətdən multikultural və tolerant ölkə olan Azərbaycana münasibətlə, monoetnik və monokonfession ölkə olan Ermənistana yanaşmaları tam əksinədir. Halbuki, 2-ci Qarabağ müharibəsi dövründə Ermənistan silahlı qüvvələri tərəfindən əsir alınan azərbaycanlı hərbi qulluqçuların əsirlik dövründə təşkilatların diqqətinə çatdırılıb. Amma Azərbaycan torpaqlarının işğaldan azad olunması dövründə Azərbaycan Silahlı Qüvvələri tərəfindən heç bir mülki obyekt və mülki əhali hədəfə alınmayıb”.

2020-ci ilin yay və payız aylarında onlarla azərbaycanlının müxtəlif ölkələrdə yaşayan ermənilər tərəfindən xüsusi amansızlıqla döyüldüyünü deyən mərkəz sədri vurğuladı ki, özlərini demokratik, ədalətli sayan qərb dövlətləri və onların nəzarətində olan beynəlxalq təşkilatlar bu məsələdə heç də ədalət nümayiş etdirməyiblər. Əgər dünyada sülhün, birgəyaşayışın qalib gəlməsini istəyiriksə, beynəlxalq birlik bu məsələlərə ciddi diqqət yetirməlidir- deyə o bildirib.