Polşanın paytaxtında Varşava Universitetinin Şərqşünaslıq fakültəsi Azərbaycan, Türkiyə və Qazaxstanın Polşadakı səfirlikləri, habelə Beynəlxalq Türk Mədəniyyəti və İrsi Fondu ilə birlikdə “Polşa və türk dünyası” mövzusunda beynəlxalq konfrans keçirib.

Fact-info.az xəbər verir ki, Azərbaycanın Polşadakı Fövqəladə və Səlahiyyətli səfiri Nərgiz Qurbanova giriş nitqi söyləyərək tədbirin əhəmiyyətindən danışıb.

Konfransda Türkiyə və Qazaxstanın bu ölkədəki səfirləri də nitq söyləyib.

Daha sonra konfarns işini seksiyalarda davam etdirib.

Azərbaycana aid xüsusi sessiyada AMEA-nın akademik Ziya Bünyadov adına Şərqşünaslıq İnstitutunun əməkdaşları tarix elmləri doktoru, professor Solmaz Rüstəmova-Tohidi, dosent Əfşan Şəfiyeva, tarix üzrə fəlsəfə doktoru Namiq Məmmədov və başqalarının məruzələri dinlənilib.
Qafqaz Tarixi Mərkəzinin direktoru, tanınmış politpoloq Rizvan Hüseynov Gəncəsar alban monastrının epiqrafik yazıları mövzusunda məruzə edib.
Konfransın sonunda “Sönməz Məşəl” Mədəni Əlaqələr İctimai Birliyinin sədri, Azərbaycan Dillər Universitetinin dosenti Şəhla Nağıyeva ictimai birliyin Azərbaycan Respublikasının QHT-lərə Dövlət Dəstəyi Agentliyinin və İctimai Televiziyanın yardımı ilə ərsəyə gətirdiyi “Şuşanın dağları başı dumanlı” bədii-sənədli filmi barədə, həmçinin Şuşanın tarixi-mədəni əhəmiyyəti haqqında danışıb. 

Daha sonra film ingilis dilində nümayiş olunub.

Filmin ssenari müəllifi Müsəllim Həsənov konfrans iştirakçılarının filmlə bağlı suallarını cavablandırıb.