Ukraynanın “Rada” dövlət informasiya-analitik telekanalında Azərbaycanın Qarabağ bölgəsi ətrafında vəziyyət, Ermənistan-Azərbaycan münasibətlərinin normallaşdırılıması və Azərbaycanın təcrübəsinin öz ərazilərinin işğalından əziyyət çəkən digər ölkələr üçün əhəmiyyəti müzakirə edilib.

Fact-info.az xəbər verir ki, Oleksiy Qomon vəv Katerina Derkaçın aparıcısı olduqları proqramda ekspert qismində jurnalist, Ukrayna-türk layihələrinin kuratoru Marına Qonçaruk çıxış edib.

Marına Qonçaruk canlı efirdə diqqəti Qarabağda vəziyyətin tarixi konteksti üzərində cəmləşdirib, xüsusən Gülüstan və Türkmənçay müqavilələri, məhz Azərbaycanın cənub və şimal hissəsinin Qacarlar İranı və Rusiya imperiyası tərəfindən işğal olunması, həmçinin ermənilərin Azərbaycan xanlıqları ərazilərinə köçürülməsindən bəhs edib.

Spiker vurğulayıb ki, Azərbaycanın işğaldan azad olunmuş ərazilərində baş verən konstruktiv proseslər təkcə region üçün deyil, həm də dünya təhlükəsizliyi arxitekturası və beynəlxalq hüquq baxımından çox mühümdür.

Marına Qonçaruk deyib: “Ermənilərin sıxışdırılıması haqqında manipulyasiya və cidd-cəhdlə yayılan yanlış məlumatlar həqiqətə uyğun deyil. Onlar bu gün Azərbaycanın Qarabağ regionunda baş verən tarixi əhəmiyyətli və ədalətli proseslərin qarşısını almaq məqsədi daşıyır. Axı Azərbaycan təkcə etnik azərbaycanlıların vətəni deyil, həm də udinlər, talışlar, avarlar, tatlar, ləzgilər və başqa xalqlar özlərini Azərbaycan millətinin bir hissəsi hesab edirlər. Onlar mədəni və etnik kimliklərini qoruyub saxlamaq üçün bütün imkan və şəraitə malikdirlər. Azərbaycanın ərazisində Qafqaz Albaniyasının məbədləri (ermənilərin öz adlarına çıxmaq istədikləri irs abidələri) qorunub saxlanılıb və bu qədim dövlətin qəbilə ittifaqına daxil olan bəzi xalqlar bugünədək xristianlığı yaşadıblar. Azərbaycanda, həmçinin qədim yəhudi icması var və bütün bunlar müxtəlif etnos və dinlərin nümayəndələri üçün bərabər imkanların olmasından xəbər verir”.

Sözlərinə yekun vuran jurnalist qeyd edib ki, Azərbaycanın suverenliyinin tam bərpası və qanunsuz erməni hərbi birləşmələri üzərində qazanılan qələbə bütün regiona rifah, sülh və sabitlik gətirəcək, habelə başqa ölkələr üçün də yaxşı nümunə olacaq.