Oktyabrın 13-də Azərbaycan İstiqlal Muzeyinin təşkilatçılığı ilə 44 günlük Vətən müharibəsi zamanı Azərbaycanın ərazi bütövlüyü uğrunda döyüşərək canlarından keçmiş şəhidlərin əziz xatirəsinə həsr olunmuş “Qəhrəmanlar can verir yurdu yaşatmaq üçün” adlı layihə çərçivəsində “Sabaha qalmayan qisas” adlı növbəti tədbir–sərgi keçirilib.

Muzeydən  Fact-info.az-a bildirilib ki, ölkə başçısının Zəfər muzeyinin və Memorial kompleksin inşası ilə əlaqədar imzaladığı Sərəncama əsasən, 2021-ci ilin yanvar ayından Mədəniyyət Nazirliyinin əmrinə əsasən Azərbaycan İstiqlal Muzeyi tərəfindən Zəfər muzeyinin fondlarının kompleksləşdirilməsi məqsədilə şəhid ailələri ilə görüş keçirilir və şəhidlərin şəxsi əşyaları Zəfər muzeyi üçün toplanılır.

Tədbirdə Azərbaycan İstiqlal Muzeyinin direktoru Sədi Mirseyibli, şəhid mayor Rəşad Budaqovun qardaşı Vüqar Budaqov, şəhid əsgər kəşfiyyatçı Səbuhi Əsədovun anası Cahan Əsədova, şəhid leytenant Elzar Yusubovun anası Günəş Yusubova, şəhid gizir Orxan Cabbarovun həyat yoldaşı Ayşən Cabbarova, şəhid əsgər Qardaşxan Əhmədlinin atası Elxan Əhmədli, şəhid çavuş Taleh Namazovun anası Afət Namazova, şəhid gizir Yaşar Babayevin anası Firəngiz Babayeva çıxış ediblər.

Bildirilib ki, Azərbaycanın ərazi bütövlüyü və suverenliyi uğrunda şəhidlik zirvəsinə ucalanların xatirəsini yaşatmaq, onların qəhrəmanlığını gələcək nəsillərə nümunə göstərmək hər birimizin borcudur. Bu məqsədlə Vətən torpaqlarının işğaldan azad olunmasında xidmətlər göstərmiş qəhrəmanlarımıza və onların ailə üzvlərinə diqqət və qayğı daima Azərbaycan dövlətinin nəzərində olmuşdur.

Daha sonra sərgidə muzey fondlarımızda qorunub saxlanılan Vətən müharibəsi şəhidlərinin şəxsi əşyaları, fotoşəkillər, sənədlər və müxtəlif hərbi geyimlər nümayiş olunub.