Bu, iki istiqamətdə baş verir. Həm hərbi, həm də diplomatik müstəvidə. Ermənistan bugünkü reallıqda birinci plandan imtina edib. Yəni, İkinci Qarabağ müharibəsində qazandığımız tarixi Zəfər Ermənistanın siyasi hərbi rəhbərliyini məcbur edib ki, birinci plandan imtina etsin. Birinci istiqamətə görə, Qarabağın Azərbaycandan ayrılması və Ermənistana birləşdirilməsi reallaşdırılmalı idi. Yeni şəraitdə məğlub ovqatda onlar bu xətlərində dəyişiklik etmək məcburiyyətində qalıblar. İndi Azərbaycanın tərkibində Qarabağ erməniləri üçün ən yüksək status əldə etməyi hədəfləyiblər və bir az da irəli gedib əldə olunmuş muxtariyyətin beynəlxalq protektorat altında reallaşdırılmasını həyata keçirmək istəyirlər. Yəni, beynəlxalq təşkilatların nəzarəti altında Qarabağda yaşayan ermənilərin fəaliyyət göstərməsini tələb edirlər. Bu da onların növbəti yuxularıdır. Bunu ancaq yuxularında görə bilərlər. Azərbaycan Prezidenti İlham Əliyevin bu məsələ ilə bağlı prinsipial, dəyişməz, qətiyyətli mövqeyi var ki, heç bir statusdan söhbət gedə bilməz. Xüsusilə Fransa kimi dövlət əgər bu gün tələb edirsə ki, Qarabağda yaşayan ermənilər üçün xüsusi bir status təmin edilsin, onda dövlətimizin başçısının qeyd etdiyi kimi elə Marseldə 120-150 min erməni yaşayır, onlara muxtariyyət statusunu versin. Azərbaycan dövləti o statusu tanımağa hazırdır.

Fact-info.az-ın məlumatına görə, bu sözləri AZƏRTAC-a açıqlamasında Milli Məclisin deputatı Elman Nəsirov deyib.

Onun sözlərinə görə, Ermənistan, ona havadarlıq edən dövlətlər, xüsusilə Fransa mətbuatı, Böyük Britaniyanın bəzi KİV-ləri açıq aşkar anti-Azərbaycan siyasəti həyata keçirməyə başlayıblar. Bu əvvəllər də var idi, amma yeni şəraitdə, reallıqlar fonunda bu dezinformasiya maşını gecə-gündüz işləmə, 7/24 rejiminə keçib. Çalışırlar ki, regionda davamlı və dayanıqlı sülh əldə edilməsin. Regiona sülh gəlməsin və belə olan vəziyyətdə isə necə deyərlər, bulanıq suda balıq tutsunlar.

“Biz xatırlayırıq, BBC də bu istiqamətdə dəfələrlə canfəşanlıq edib. Xüsusilə heç yadımızdan çıxmaz, 2017-ci ildə Xocalı şəhərini - Azərbaycanın tarixi ərazisi, ermənilərin soyqırımı törətdiyi bu şəhəri utanmadan, çəkinmədən “Artsax”ın bir kəndi kimi təqdim etmişdi. Fransa mətbuatı gecə-gündüz ermənipərəst mövqeyini ortaya qoyur. Fransa prezidenti Emanuel Makron yerli televiziya kanallarına müsahibəsində açıq-aşkar ermənipərəst mövqeyini bildirir, Ermənistanın yanında olduğunu ifadə edir, onları yalnız qoymayacaqlarını qeyd edir. Həmçinin Qarabağ ermənilərinin siyasi hüquqları və təhlükəsizliyi məsələlərini qabardır, muxtariyyət məsələsini dilinə gətirir. Onun üçün beynəlxalq protektorat deyəndə elə Fransa protektorluğu nəzərdə tutulduğunu da dolayısı ilə beynəlxalq ictimai fikrə sırımaq istəyir. Elə Fransa mətbuatı da bu istiqamətdə gecə-gündüz, yalan, iftira ifraz etməklə məşğuldur. Amma bütün bunlar heç bir nəticə verməyəcək. Çünki bizim işimiz haqq işidir. Biz beynəlxalq hüquqa hörmətlə yanaşır, ona istinad edib öz siyasətimizi həyata keçirən dövlətik. Biz güclüyük, ölkəmiz 1990-cı illərin Azərbaycanı deyil. Azərbaycan bu gün çox güclü dövlətdir və bunu sözlə deyil, əməli addımlarla, tarixi Zəfəri ilə təsdiqləyib. Yeri gəlmişkən, Ali Baş Komandanımızın söylədiyi kimi üç il bundan qabaq tarixi Zəfərə imza atmış Ordumuz indi daha güclüdür və şərtləri biz diktə edirik, heç kim bizə şərt diktə eləyə bilməz. Kimlər ki, Azərbaycanı hədəfə alıb bilsinlər ki, odla oynamaq olmaz, özlərini yandırar”, - deyə Elman Nəsirov qeyd edib.