Bunu Türkiyənin hakim Ədalət və İnkişaf Partiyasının İqdırdan olan deputatı Cantürk Alagöz deyib.

Onun sözlərinə görə, Türkiyənin Ağrı vilayətində baş verən son zəlzələ bölgə əhalisi arasında narahatlığı artırıb. İnsanlar qorxu və həyəcanı daha çox Ermənistandakı “Metsamor” AES-lə bağlıdır.

Deputat bildirib ki, AES tək Türkiyə deyil, bütövlükdə region ölkələri üçün təhlükə mənbəyidir.

C.Alagöz “Metsamor” AES-in çökməsi və yaxud stansiyadan sızmaların olmasından ehtiyat etdiklərini söyləyib.

“Metsamor” qapımızın ən böyük təhlükəsidir” deyən deputat əlavə edib ki, İqdırın 30 kilometrliyində yerləşən stansiya köhnə texnologiya ilə tikilib və ilk növbədə, Türkiyə, Ermənistan, Azərbaycan, Gürcüstan və İran üçün böyük təhlükə yaradır: “Bu stansiya 2005-ci ildə bağlanmalı olsa da, 18 ildir ki, təmir adı altında işləyir. Xalqımız üçün həssas olan bu təhlükəni Atom Enerjisi üzrə Beynəlxalq Agentlik, Türkiyə Böyük Millət Məclisi və dünya ictimaiyyətinin diqqətinə çatdıracaq, stansiyanın bağlanmasına çalışacağam. İnsanlığa qarşı törədilən bu cinayət qarşısında Ermənistan xalqı da çox narahatdır və əziyyət çəkir. Ermənilər də bu elektrik stansiyasının bağlanmasına etiraz edirlər. Ermənistanın enerjisinin 27%-ni təmin edən bu stansiya bütün cəhdlərə baxmayaraq, fəaliyyətini dayandırmır”.

Millət vəkili Cantürk Alagöz sözlərinə belə davam edib: “Ermənistan illərdir ki, kin və düşmənçiliklə idarə olunur. 30 il əvvəl Qarabağda törədilən qırğınlar buna sübut idi. Azərbaycan torpaqlarının 20 faizi 30 il erməni işğalı altında qalıb. 44 günlük Müharibəsi ilə torpaqlar geri alındı. Ermənilər düşmənçiliklərini dayandırmalı, uzadılan sülh əlini sıxıb bölgənin sülh və təhlükəsizliyini bərqərar etməlidirlər. Axı, Metsamor Elektrik Stansiyası dağılanda Ermənistan deyilən yer qalmayacaq. Daim deyirlər ki, bölgəmizdə xərçəng xəstəliyi intensivdir. Hadisələrin artmasına səbəb kimi də Metsamor göstərilir. İqdır Dövlət Xəstəxanasında Onkologiya şöbəsinin açıqlamasını da təmin edəcəyəm. Demək istəyirəm ki, stansiyaya görə təhlükə altında olan əsas ölkə Ermənistandır. Amma sülh olsa, həm Türkiyə, həm də Azərbaycan bu 27%-lik enerji kəsirini ödəyə bilər”.

O, bölgəni təhdid edən "Metsamor" Atom Elektrik Stansiyasının bağlanması üçün addımlar atacağını da bildirib.

Qeyd edək ki, Metsamor AES Ermənistanın Türkiyə ilə sərhədindən 16 km aralıda yerləşir. Gücü 408 MVt olan 2 ədəd VVER-440/230 tipli reaktorlardan biri işləkdir. Elektrik stansiyası Ermənistanın paytaxtı İrəvandan 32 km, Qarsdan 100 km və İqdırdan 30 km məsafədədir. Elektrik stansiyasının birinci reaktoru 1976-cı ildə, ikincisi isə 1980-ci ildə istismara verilib. 1988-ci ildə Spitak zəlzələsində zədələnməsə də, əhalinin təzyiqi və etirazları nəticəsində stansiyanın hər iki reaktoru bağlanıb. 1993-cü ildə Ermənistan hökuməti enerji böhranı ilə əlaqədar ikinci bloku yenidən işə salmaq qərarına gəlib və bəzi təkmilləşdirmə işlərindən sonra aqreqat 1995-ci ildə istismara verilib. 2005-ci ildə planlaşdırılan istismar müddətini başa vuran elektrik stansiyasının istismar müddəti 2016-cı ilə qədər uzadılıb. 2016-cı ildə elektrik stansiyasının istismar müddətini 2026-cı ilə qədər uzatmaq planlaşdırılırdı. 2018-ci ildə 2036-cı ilə qədər uzadılmasının planlaşdırıldığı açıqlanıb. Müxtəlif mənbələrə görə AES bu gün dünyada mövcud elektrik stansiyaları arasında ən təhlükəli reaktorlardan biridir. Onun tikintisi zamanı sovet alimləri və Ermənistandakı dairələr stansiyanın nasazlıq xəttində yerləşməsi və su ehtiyatlarına sızma ehtimalı olması səbəbindən onun tikintisinə qarşı çıxırdılar.

Müxtəlif qeyri-hökumət təşkilatları, bəzi akademiklər və Avropa İttifaqı zavodun ətraf ərazilər üçün təhlükə yaratdığını iddia edərək, onun bağlanmasını tələb ediblər. Onun zəlzələ zonasında yerləşməsi və müxtəlif uyğunsuzluqlar elektrik stansiyası ilə bağlı narahatlıq doğurur.