Fact-info.az-ın məlumatına görə, bu sözləri AZƏRTAC-a açıqlamasında Milli Məclisin deputatı Ceyhun Məmmədov deyib.

Deputat bildirib ki, dövlətimizin başçısının birbaşa nəzarəti və iştirakı ilə ilin əvvəlindən indiyədək genişmiqyaslı bərpa-quruculuq işləri, çoxsaylı yeni infrastruktur layihələri həyata keçirilib. Onun sözlərinə görə, müharibədən çıxmış bir ölkə üçün bunlar çox böyük işlərdir və Azərbaycanın iqtisadi gücünün göstəricisidir.

“Biz davamlı olaraq Azərbaycan Prezidentinin işğaldan azad edilmiş ərazilərdə yeni infrastruktur obyektlərinin açılışında iştirakının şahidi oluruq. Yeni yollar salınır, yeni məktəblər, səhiyyə ocaqları inşa edilir. Bir sözlə, Azərbaycanın hər bölgəsində mühüm layihələr həyata keçirilir. Dövlətimizin başçısı son səfərində Qazax, Şəmkir, Samux və Bərdə rayonlarında oldu. Qazax rayonunda mühüm obyektlərin açılışını edən Prezident İlham Əliyev işlərin vəziyyəti ilə yerində maraqlandı. Qazaxda görülən işlər, həmçinin yeni iş yerlərinin açılması deməkdir”, - deyə C.Məmmədov vurğulayıb.

Qazax Müəllimlər Seminariyası ADA Universiteti Qazax Mərkəzinin açılışını önəmli hadisə kimi qiymətləndirən deputatın sözlərinə görə, dövlətimizin başçısı bununla Qazax seminariyasının tarixi nüfuzunu yenidən bərpa etmiş oldu. Bu, həm də Azərbaycan elminə və təhsilinə diqqətin bariz nümunəsidir.

“Azərbaycan Prezidenti əhalinin yaşayış şəraitinin yaxşılaşdırılması istiqamətində ardıcıl və davamlı siyasət yürüdür. Atılan addımlar məqsədyönlü şəkildə həyata keçirilir. Görülən işlər, reallaşdırılan layihələr Azərbaycan xalqının daha yaxşı yaşamasına, rifah halının yaxşılaşdırılmasına hesablanıb. Azərbaycan müasirləşir, Azərbaycan yenidən qurulur və daha da inkişaf edir”, - deyə Ceyhun Məmmədov fikirlərini tamamlayıb.