Bunu Milli Məclisin deputatı professor Kamilə Əliyeva deyib.

Prezident İlham Əliyevin səfər çərçivəsində Şuşa şəhərində, Daşaltı kəndində olduğunu diqqətə çatdıran deputat Şuşa Qlobal Media Forumu ilə bağlı fikirlərini də bölüşüb: “Şuşaya gələn xarici qonaqlar bu şəhərin gözəlliyindən və qısa müddət ərzində görülən bərpa işlərindən heyrətlərini gizlədə bilmirdilər. Mədəniyyət paytaxtımız olan Şuşa şəhəri son dövrlər bir çox beynəlxalq tədbirlərin mərkəzinə çevrilib. Prezident İlham Əliyevin "4-cü Sənaye İnqilabı dövründə Yeni Media" mövzusunda Şuşa Media Forumunun açılış mərasimində söylədiyi fikirlər böyük maraq doğurdu. Dövlətimizin başçısı çıxışında Azərbaycanla Türkiyə arasında mövcud qardaşlıq münasibətlərindən, dünyada baş verən geosiyasi vəziyyətdən, Vətən müharibəsində Qələbəmizdən sonra sülh müqaviləsinin imzalanması prosesindən və ölkəmizdə azad medianın inkişafından danışaraq, ona ünvanlanan sualları geniş və ətraflı cavablandırdı. Ölkə Prezidentinin Forumda çıxışı bütün dünyada böyük maraqla izləndi.

Dövlətimizin başçısı Azərbaycan mediasının fəaliyyətini də çox yüksək qiymətləndirərək, onların müharibə dövründə əsl vətənpərvərlik nümayiş etdirdiklərini vurğuladı”, - deyə K.Əliyeva bildirib.

Azərbaycanın regionda yerləşən bütün dövlətlərlə sülh, mehriban qonşuluq şəraitində yaşamaq siyasəti həyata keçirdiyini vurğulayan K.Əliyeva Ermənistanda hələ də revanşist və Azərbaycana qarşı torpaq iddiasında olan qüvvələrin mövcud olmasından təəssüfləndiyini bildirib.

“Gündən-günə nüfuzu artan və güclənən Azərbaycan Ermənistanla sülh sazişinin bağlanmasının və bölgədə yerləşən dövlətlərin, xalqların səmimi qonşuluq şəraitində yaşamasının tərəfdarıdır. Təəssüflər olsun ki, Ermənistandakı və xaricdəki bəzi qüvvələr, eləcə də Qarabağdakı separatçılar bölgədə sülhün yaranmasına böyük maneələr törədirlər. Bu gün Qarabağda özlərini "prezident", "nazir" adlandıranlar gülüş hədəfinə çevriliblər. Bu ünsürlər başa düşməlidirlər ki, yaxın zamanda Qarabağın bütün əraziləri Azərbaycan dövlətinin nəzarətinə keçəcək. Qarabağda yaşayan erməni əsilli əhali reinteqrasiya olunacaq. Azərbaycanın qanunları ilə yaşamaq istəməyənlər Qarabağı tərk etmək məcburiyyətində qalacaqlar”, - deyə Kamilə Əliyeva qeyd edib.