Medianın inkişafı cəmiyyətdə gedən  proseslərin, dünyada baş verən qlobal hadisələrin və digər çox saylı faktorların təsiri nəticəsində  mümkün olur. Ən əsası cəmiyyətdə baş verən inkişaf və yaxud durğunluq jurnalistikadan yan keçmir.

Ümumiyyətlə, media ilə bağlı ciddi problemləri yenidən təkrarlamaq, Milli Mətbuat günündə Azərbaycanın jurnalistika tarixinə təkrar nəzər salıb oxucunu yormaq istəmirəm. Çünki bu barədə kifayət qədər danışılıb.  Mənim  qənaətimcə, bu sahənin xilası naminə inkişaf  strategiyası və yaxud yol xəritəsi işlənib hazırlanmalıdır. Bir çox faktorlarla bərabər azad medianın gücü,  qan damarı şəffaf  və geniş həcmli halal maliyyədən başlayır. Bunun üçün iqtisadi faktora daha çox önəm verməliyik.  Deməli,  reklam verən şirkətlərin mütəmadi olaraq reytinq göstəricisini göstərilməklə bərabər onlara maksimum güzəştlərin tətbiqi zəruridir. Mütəmadi olaraq medianın maliyyə problemindən yazıb təkliflər səsləndirmişik. Təəssüf ki, diqqət  göstərən olmayıb.

Digər bir zəruri məsələ  təhsilsizlik,  mütaliəsizlik  ciddi məsələ olaraq qalmaqdadır. Etiraf etmək lazımdır ki, təhsildə baş verən problemlər cəmiyyətdə savadsızlığa rəvac verir.  O baxımdan  medianın savadlanması məsələsi üzərində düşünmək lazımdır. Çünki zaman- zaman çox intellektli insanlar jurnalistikanı incidilərək və yaxud başqa səbəblərdən tərk ediblər. Əvəzində isə təsadüfi şəxslər mediaya gəlib. Bu daha çox telekanallarda acınacaqlı şəkildə hiss olunur. 

Həmçinin sosial şəbəkələrin əhatə dairəsinin sürətlə genişlənməsi və iştirakçı sayının artması bir çox hallarda jurnalistikaya marağı azaldır. Sosial şəbəkə iştirakçıları bəzən özlərinin həmin məkandakı azad fəaliyyətini jurnalist fəaliyyəti kimi təqdim edirlər. Bu nə dərəcədə yanlışdır, dogrudur və yaxud qorxuludur onu demək çətindir.

Həmçinin Azərbaycan Respublikasının Medianın İnkişafı Agentliyinin  fəaliyyətini diqqətdə saxlamaq lazımdır. Bu qurumun fəaliyyətində ciddi qüsurlar görünür. Bu başqa bir yazının mövzusudur. Ona mütləq dönəcəyik. Əlqərəz Medianın İnkişafı Agentliyi  KİVDF-nin etdiyi səhvləri təkar etməməlidir.

 Nəhayət fədakar,  öz peşəsini ləyaqətlə davam etdirən, heç zaman  qürurunu qırmayan jurnalistikanın qorunub saxanması dövlətimizin, medianın, ümumilikdə  cəmiyyətin strateji maraqlarına xidmət edir. 

Bayramınız mübarək olsun, medianın fədailəri!!!

    Əkrəm Bəydəmirli