Biz Xəzər rayonu Şağan qəsəbəsinə gələndə Natiq Məmmədbəylinin evini tapmaq çətin olmadı. Yaşadığı küçənin girişində dalğalanan şanlı Azərbaycan bayrağı və şəhidin böyük bir şəkli olan lövhəsi onun bu məhəllədə yaşadığından xəbər verirdi.

Natiq Vahid oğlu 18 iyul 1993-cü ildə Xəzər rayonu Şağan qəsəbəsində anadan olub. 2011-ci ildə hərbi xidmətə yollanan Natiq Murovdağda xidmət edib. 29 sentyabr 2020-ci ildə könüllü olaraq Vətən müharibəsinə qatılıb. Füzuli, Cəbrayıl, Hadrut və Xocavənd istiqamətində gedən döyüşlərdə iştirak edib. 20 oktyabr 2020-ci ildə Xocavənd istiqamətində gedən döyüşlərdə Şəhid olub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15 dekabr 2020-ci il tarixli Sərəncamına əsasən Natiq Məmmədbəyli “Vətən uğrunda” medalı ilə təltif edildi. Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq igidlik nümayiş etdirdiyinə görə, Azərbaycan Prezidenti İlham Əliyevin 25 dekabr 2020-ci il tarixli Sərəncamına əsasən Natiq Məmmədbəyli ölümündən sonra “Xocavəndin azad olunmasına görə” medalı ilə təltif edildi. 

Şəhidimizin anası Güldanə xanımın Natiq haqqında fikirləri belə oldu: “Bütün Şəhidlər kimi Natiq də seçilmiş insanlardan biri idi. Mən Şəhid anaları ilə söhbət edən zaman hiss edirəm ki, bu qəhrəmanlar bir sıra keyfiyyətlərinə, milli dəyərlərə sadiqliyinə görə, çox oxşardırlar. General Polad Həşimov qəhrəmancasına dünyasın dəyişdikdən sonra Natiq deyirdi ki, mən də cəbhəyə, döyüşə gedəcəm. Mən onu saxlaya bilməzdim. Nəhayət o, 2020-ci ilin senyabrın 29-da könüllü olaraq, sevinə-sevinə döyüşə getdi. Natiq sürücü idi. Lakin o, cəbhəyə gedən kimi, silah götürüb döyüşə başlayıb. Onun döyüş yoldaşları danışırdı ki, Natiq qorxu nə olduğun bilmədən Füzuli, Cəbrayıl, Hadrut və Xocavənd istiqamətində gedən döyüşlərdə şücaət göstərib”.

Şəhidimizin anası Güldanə xanım Natiqin nişanlı olduğunu və pandemiya səbəbindən toy edə bilmədiklərini bildirib: “Biz düşünürdük pandemiya bir az səngisin. Toylara icazə verilsin, sonra biz də Natiqi evləndirək. Lakin oğlum döyüşə getməyi qərar verdi və Şəhidlik zirvəsinə ucaldı. Bu gün bizim təsəllimiz odur ki, torpaqlarımız işğaldan azad olub. Ordumuz qəhrəmanlıq göstərib. Mən övladımla fəxr edirəm. Heç yadımdan çıxmır. Natiq könüllü gedəndə mənə demişdi: “Sən öğlunla fəxr edəcəksən. Biz qələbə qazanacağıq”. Mən o zaman Natiqin nə dediyini anlamadım. Sonradan mənə aydın olur ki, Natiq Şəhidlik zirvəsinə ucalmağı nəzərdə tuturmuş. Sanki o, hər şeyi hiss edirdi. Allah bütün Şəhidlərimizə rəhmət eləsin”. 

Biz media nümayəndəsi olaraq, Şəhidlərimizin məkanı cənnət, ruhu şad olsun deyirik. 

Fact-info.az