Fact-info.az xəbər verir ki, bunu APA-ya açıqlamasında Milli Məclisin deputatı Müşfiq Cəfərov bildirib.

Deputat deyib ki, Fransada hər zaman irqi və dini baxımdan ayrıseçkiliyə görə qarşıdurmalar yaşanıb: “İndi isə problem bunlar deyil. Artıq Fransa hakimiyyəti xalqı tamamilə bezdirib, insanlar küçələrə çıxıb, yanğınlar törədir, polislə qarşıdurmalar yaşayır. Xüsusilə vergilərin artması, sosial dövlət adı altında insanların qazancının yarısından çoxunun vergi bahanəsiylə alınması fonunda dövlətdən narazılıqların yaranması normal, bu aksiyalar gözlənilən idi. Fransa küçələrində maşınlar yandırılırsa, insanların malı-mülkü daim təhlükə qarşısındadırsa, bunlara görə hökumət xalqa hesabat verməlidir. Fransada hökumət xalqın həyat və mülk təhlükəsizliyini təmin edə bilmir”.

Müşfiq Cəfərov qeyd edib ki, əgər bir dövlət başdan-ayağa problemin, iğtişaşın, qırğın-qiyamətin, yanğının, irqçiliyin içərisindədirsə, başqa ölkələrdəki demokratik vəziyyət barədə danışmamalıdır: İnsan haqları, demokratik dəyərlər mövzusunda hər kəsə "dərs keçmək" iddiasında olan Fransa hakimiyyəti bu gün sivil insanların üzərinə silahlı dəstələri göndərir, gənc əlcəzairli vətəndaşı polis tərəfindən güllələnərək öldürülür. Özünün dəyərləri və ənənələri ilə qürur duyan Fransa cəmiyyəti üçün bu, ciddi utancdır və fransızlar prosesə sükutla yanaşmaq niyyətində deyil. Fransada başlanmış iğtişaşlar, barrikadaların qurulması, avtomobillərin, müxtəlif obyektlərin yandırılması, polislə toqquşmalar artıq prosesin sadəcə etiraz yox, kütləvi itaətsizlik olmasının göstəricisidir. Baş verənlər göstərir ki, xalqın Makron hakimiyyətinə etimadı qalmayıb. Bu, əslində Makron hakimiyyətinin ciddi fəlakəti deməkdir”.