Fact-info.az-ın  məlumatına görə, bu fikirləri AZƏRTAC-a açıqlamasında politoloq Amid Əliyev söyləyib.

Politoloq bildirib ki, bu gün Qarabağda aparılan yenidənqurma və bərpa işləri zamanı bir sıra kütləvi məzarlıqlar aşkar edilib. Belə kütləvi məzarlıqlardan biri də Şuşa həbsxanasında tapıldı. Çox ehtimal ki, bu məzarlıqda işgəncə nəticəsində qətlə yetirilmiş azərbaycanlı hərbçilər basdırılıb.

“Bu gün isə yeni bir kütləvi məzarlıq Ağdam rayonunun azad edilmiş Sarıcalı kəndində aşkar edildi. Bu, Qarabağ ərazisində aşkar edilən növbəti, ancaq çox böyük ehtimalla sonuncu kütləvi məzarlıq deyil. Çünki Birinci Qarabağ müharibəsi zamanı itkin düşmüş 4 minə yaxın azərbaycanlının taleyi haqqında heç bir məlumat yoxdur. Ermənistan tərəfi bu günə qədər həmin şəxslər haqqında məlumatları Azərbaycana təqdim etməyib. Çünki ermənilər əsir və girov götürülmüş azərbaycanlıları vəhşicəsinə qətlə yetirib, kütləvi şəkildə dəfn ediblər. Bütün bunlar onu deməyə əsas verir ki, Ermənistan dövləti son 30 il ərzində gizlətməyə çalışdığı qanlı və qaranlıq keçmişinin üstündən xətt çəkə bilməyəcək. Kütləvi məzarlıqlardakı cəsədlərdən əldə edilmiş faktlar və aparılmış müayinələr onlara olmazın işgəncələr verildiyini sübut edir”,- deyə A.Əliyev diqqətə çatdırıb.

O əlavə edib ki, işğaldan azad olunmuş ərazilərdə aşkarlanan məzarlıqlar əsl erməni xislətinin, barbarlığının və vəhşiliyinin bariz nümunəsidir. Bütün bu faktlara, hərbi cinayətlərə və vəhşiliklərə görə Ermənistan dövləti Beynəlxalq Ədalət Məhkəməsi qarşısında cavab verməli olacaq və lazım olan cəzanı alacaq. Bunlara baxmayaraq, indiyədək bu siyasət Ermənistanın siyasi hakimiyyəti tərəfindən davam etdirilir. Belə ki, bir neçə ay bundan əvvəl pis hava şəraiti səbəbindən yolu azaraq Ermənistan ərazisinə keçmiş iki nəfər Azərbaycan hərbi qulluqçusuna işgəncələr verildi, təzyiqlər göstərildi və onlara heç bir real siyasi və hüquqi əsas olmadan cinayət işi qaldırıldı.

Bütün qeyd olunan faktlar real şəraitdə dünyanın gözü qarşısında baş verdi. Bir sıra insan hüquqları üzrə ixtisaslaşmış təşkilatlar isə bu faktlar qarşısında susur, növbəti dəfə selektiv yanaşmaya və ikili standartlara yer verir. Xatırladaq ki, Azərbaycan dövləti və xalqı baş verən bütün bu vəhşilikləri yaddan çıxarmayacaq. Dövlət səviyyəsində isə lazım olan cəzanın tətbiq olunmasına qədər mübarizə aparılacaq.