M. Zaxarova deyib: “Mayın 19-da Moskvada Rusiya xarici siyasət idarəsinin başçısı Sergey Lavrovun Azərbaycan Respublikasının xarici işlər naziri və Ermənistan Respublikasının xarici işlər naziri ilə üçtərəfli və ayrı-ayrılıqda ikitərəfli görüşləri olacaq”.

Fact-info.az xəbər verir ki, onun sözlərinə görə, sülh sazişi üzrə Ermənistan-Azərbaycan ikitərəfli danışıqları da keçiriləcək. M.Zaxarova əlavə edib ki, xarici siyasət idarələrinin rəhbərləri regionda dinamik vəziyyəti nəzərə almaqla, Bakı və İrəvan arasında münasibətlərin normallaşması perspektivlərini müzakirə edəcəklər.

Rusiya XİN-in rəsmi nümayəndəsi qeyd edib ki, bu üçtərəfli prosesin əsası olan Rusiya, Azərbaycan və Ermənistan liderlərinin 2020-ci il noyabrın 10-da, 2021-ci il yanvarın 11-i və noyabrın 26-da, 2022-ci il oktyabrın 31-də əldə olunmuş üçtərəfli razılaşmaların həyata keçirilməsi, o cümlədən iqtisadi və nəqliyyat əlaqələrinin blokadasının aradan qaldırılması, Ermənistan-Azərbaycan sərhədinin delimitasiyası, ölkələr arasında sülh sazişinin hazırlanması, həmçinin ictimaiyyət, ekspertlər və parlamentarilər xətti ilə təmaslar detallı şəkildə müzakirə ediləcək.

M.Zaxarova sonda deyib: “Lavrovun azərbaycanlı və erməni həmkarları ilə ayrıca görüşlərində, həmçinin gündəlikdə duran daha aktual ikitərəfli və beynəlxalq məsələlər üzrə fikir mübadiləsi aparılması nəzərdə tutulur. Biz hesab edirik ki, qarşıdakı təmaslar Bakı və İrəvanın mübahisəli məsələlərin nizama salınmasında irəliləyiş əldə etməsinə, qarşılıqlı şəkildə qəbul edilən həll yollarının axtarılmasına və ümumilikdə, tərəflər arasında etimadın yüksəldilməsinə, Cənubi Qafqazda sabitliyin möhkəmlənməsinə kömək edəcək”.