Fact-info.az-ın  məlumatına görə,  bu fikirləri AZƏRTAC-a açıqlamasında Bakı Dövlət Universitetinin Beynəlxalq münasibətlər və iqtisadiyyat fakültəsinin müəllimi politoloq Aytən Qurbanova söyləyib.

Politoloq deyib ki, bütün sərhədləri aşaraq Azərbaycanın ərazi bütövlüyünə münasibətdə qərəzli mövqe nümayiş etdirməyə sadiq qalan Fransa beynəlxalq hüquq normalarına münasibətdə də ikili yanaşma nümayiş etdirməkdən çəkinmir.

Aytən Qurbanova Fransanın Ermənistandakı səfirliyinə yeni hərbi attaşe təyin edəcəyi ilə bağlı paylaşılan xəbərlərin heç də təsadüfi olmadığını və ya normal prosedur qaydalara uyğun xarakter daşımadığını vurğulayıb. Onun sözlərinə görə, bu informasiya özlüyündə Fransanın Ermənistanın hərbi potensialının artırılmasında necə maraqlı olduğunu və gizli hərbi əməkdaşlıq planlarını açıq şəkildə ifşa edir. Bu nöqteyi-nəzərdən yanaşdıqda, işğalçılıq ideologiyasının ən qəddar nümunələrini həyata keçirmiş, qəddar müstəmləkə keçmişinə sahib Fransa kimi dövlətin öz maraqlarını təmin etmək üçün ənənəvi tarixi təcrübəsinə əsaslanması heç də təəccüb doğurmur.

“Amma Avropa İttifaqının əsas siyasi güc mərkəzi hesab edilən Fransanın Cənubi Qafqazda sülh quruculuğu prosesinə zərbə vuran addımlarına, bütün beynəlxalq hüquq normalarına zidd mövqeyinə və işğalçını silahlandırmaqla növbəti hərbi qarşıdurmalara rəvac verəcək çıxışlarına digər üzv dövlətlərin, ümumilikdə isə qlobal institusional qurumların heç bir münasibət bildirməməsi həm təəccüb, həm də təəssüf yaradan əsas məqamdır”, - deyə Aytən Qurbanova vurğulayıb.