Fact-info.az xəbər verir ki, Azərbaycanda 2023-cü ilin “Heydər Əliyev İli” elan edilməsi ilə əlaqədar “Azərxalça” ASC-nin tədbirlər planına uyğun olaraq, “Can Azərbaycan” MMC ilə birlikdə təşkil etdiyi təqdimatda əvvəlcə “Azərxalça” ASC İdarə Heyətinin Sədri, Əməkdar İncəsənət xadimi Emin Məmmədov çıxış edərək, tədbir haqqında məlumat verib. O deyib: “Dövlətimizin başçısının 2016-cı il 25 noyabr tarixi Sərəncamı ilə hər il mayın 5-i Azərbaycanda “Xalçaçı Günü” kimi qeyd olunur. Xalçaçılar öz peşə bayramlarını əlamətdar bir dövrdə - milli dəyərlərimizin hamisi, Ulu Öndər Heydər Əliyevin doğum günü ərəfəsində qeyd edirlər. Belə bir tarixi günün təsis edilməsi Ümummilli Liderimizin bizə bəxş etdiyi müstəqilliyin bəhrəsidir. Bu gün burada “Heydər Əliyev 100” adlı xatirə xalçasının təqdimatını təşkil etmişik. Tədbirin əsas məqsədi Ümummilli Lider Heydər Əliyevin əziz xatirəsini məhz dəyər verdiyi, böyük diqqət göstərdiyi xalça sənəti vasitəsilə, əsl Azərbaycan xalçası ilə yad etməkdən ibarətdir. Ulu Öndər Azərbaycan xalqının milli mədəniyyətinə, onun tarixi qaynaqlarına həmişə böyük diqqətlə yanaşıb, mədəniyyət və incəsənət xadimlərinin yaradıcı axtarışlarına dəstək verib. “Azərxalça” ASC Ümummilli Liderin qoyduğu bu yolda addımlayaraq, hər zaman öz müştərilərinə yeni ideyalarını, fikirlərini və öz dünyalarını xalçaya köçürməyə imkan yaradır. Bu yolda qurum gənc rəssamlar, dizayner və xalçaçılarla geniş əməkdaşlıq əlaqələri yaradır. Xatırladaq ki, qədim xalçaçılıq sənəti Ulu Öndər Heydər Əliyevin daim qayğı göstərdiyi və yüksək qiymətləndirdiyi sahə kimi müstəqillik illərində daha da inkişaf etmişdir. Məhz Ulu Öndərin hakimiyyətə qayıdışından sonra mədəniyyətin digər sahələrində olduğu kimi, xalça sənətində də böyük dirçəliş oldu. Xalçaçılar hər zaman Ulu Öndərin əziz xatirəsini dərin hörmətlə anır, sənətlərinə verilən önəmli dəyərin fərqində olduqlarını unutmurlar".

Təqdim olunan nadir xalçanın ideya müəllifi, Əməkdar artist Tahir İmanov bu gözəl təşəbbüsdən danışaraq bildirib ki, xalçaya olan ilk sevgisi keçən əsrin 80-cı illərində Şuşa şəhərində yaranıb: "Babam, bəstəkar, Xalq artisti Süleyman Ələskərovun evinə çoxlu tanınmış insanlar gəlirdi. 1986-cı ildə bizim evimizə xalçaçı-rəssam, Xalq rəssamı Lətif Kərimov gəldi və ilk dəfə onun xalçalara olan sevgisini elə onun öz dilindən eşitdik. Onun xalçalarla bağlı sözlərini dinləyərkən o vaxt uşaq olsaq da, sanki xalçaların sehrinə düşürdük. İllər keçdi və bu sevgi içimizdə qaldı, sonradan qardaşım Cabir İmanov xalçaya aid olan böyük bir layihəyə imza atdı. Sonra düşündüm ki, mən də bu sahədə nə isə etmək istəyirəm və beləcə dostlarla birgə belə bir gözəl işi ərsəyə gətirdik. Ulu Öndərlə ünsiyyətdə olmuş insan kimi düşündüm ki, mən də Heydər Əliyevin 100 illiyi ilə bağlı nə isə edə bilərəm və ideya yarandı. Bu gün təqdim olunan layihə Azərbaycanın xəritəsi ilə bağlıdır və ümumilikdə düşünürəm ki, Ulu Öndər Heydər Əliyev Azərbaycanın özüdür. Bu özəl 100x100 ölçüsündəki yun xalça yalnız 100 nüsxədə toxunub. Xalçanın üzərində Azərbaycanın bölgələrinə xas xalça növlərinin göstərildiyi xəritə, Ümummilli Liderin hər zaman sevə-sevə səsləndirdiyi Səməd Vurğunun "Azərbaycan" şeirindən sətirlər, Heydər Əliyevin “Mən həmişə fəxr etmişəm, bu gün də fəxr edirəm ki, mən Azərbaycanlıyam!” sözləri və onun 3D formatında imzası yer alır. Xalça təqdim olunduğu gündən etibarən satışa çıxarılacaq və bu seriya bir daha istehsal olmayacaq".

Sonra "Heydər Əliyev 100” adlı nadir xatirə xalçası təqdim olundu.

Qeyd edək ki, təqdimatdan əvvəl “Azərxalça” ASC-nin kollektivi Fəxri xiyabana gedərək Ümummilli Liderin məzarını ziyarət edib, Ulu Öndərin əziz xatirəsini ehtiramla anıblar.