Fact-info.az xəbər verir ki, bu sözləri Siyasi Tədqiqatlar İnstitutunun direktoru, rusiyalı politoloq Sergey Markov söyləyib.

S.Markov əlavə edib: “Ermənistanda bir çox siyasətçilər, dünyanın müxtəlif ölkələrində diaspor üzvləri ümid edirdilər ki, Qarabağ ermənilərinin suverenliyi Ermənistan çərçivəsində qorunub saxlanılacaq. Nəzarət-buraxılış məntəqəsinin qurulması Azərbaycanın Qarabağın bütün ərazisində, o cümlədən Rusiya sülhməramlı kontingentinin yerləşdiyi hissədə suverenliyinin tam bərpa olunması üzrə iradəsinin birbaşa ifadəsidir”.

Politoloqun fikrincə, indi Qarabağ erməniləri Azərbaycan dövlətinin Qarabağın bütün ərazisində vəziyyətə tam nəzarət edəcəyini başa düşürlər.

Qarabağ ermənilərinin Azərbaycanın tərkibində gələcək statusunu şərh edən politoloq vurğulayıb ki, “Heydər Əliyevin SSRİ və Rusiyanın inkişafında rolu” mövzusunda keçirilən dəyirmi masada Azərbaycanda rus diasporunun nümayəndələri də diskussiyalarda iştirak ediblər.

Ekspert əlavə edib: “Biz rus diasporunun Azərbaycanda özünü necə yaxşı hiss etdiyini görürük. Bu diaspor parlamentdə, digər hakimiyyət orqanlarında, siyasi sistemdə təmsil olunub. Bu, Qarabağın erməni icmasında onların Azərbaycan cəmiyyətinə rahat inteqrasiya edəcəyinə, Qarabağ ermənilərinin hüquqlarının təkcə Qarabağ ərazisində deyil, həm də bütün Azərbaycanda qorunacağına möhkəm əminlik yaratmalıdır. Erməni deputatların gələcəkdə Azərbaycan parlamentində təmsil olunacağı heç də fantastika deyil”.

Politoloq qeyd edib ki, Azərbaycan, Rusiya və Ermənistan xarici işlər nazirlərinin qarşıdakı üçtərəfli görüşündə (bu görüş barədə Rusiya XİN-in rəsmi nümayəndəsi Mariya Zaxarova məlumat verib və dəqiq vaxtını açıqlamayıb-red.) Qarabağın erməni icmasının inteqrasiyası məsələsi də müzakirə ediləcək.

S.Markov sonda deyib: “Rusiya Ermənistanın tərəfində Azərbaycanla münaqişədə iştirak etməyəcək. Erməni icmasının sürətlə və rahat şəkildə Azərbaycan cəmiyyətinə inteqrasiyası Ermənistanın bunu nə qədər tez başa düşəcəyi amilindən asılıdır”.