İyulun 12-də Ermənistan silahlı qüvvələrinin bölmələri atəşkəs rejimini pozaraq artilleriyadan və iriçaplı silahlardan istifadə edərək Azərbaycan ilə dövlət sərhədinin Tovuz rayonu istiqamətindəki mövqelərini ələ keçirməyə cəhd edib, düşmən hücumunun qarşısı qətiyyətlə alınıb. Döyüşlərdə Azərbaycan Ordusunun hərbçiləri şəhid olub, yaralananlar var.

AZƏRTAC-ın xüsusi müxbirinə müsahibəsində tarix üzrə fəlsəfə doktoru, professor Nemat Pavlonov bildirib ki, Tovuz rayonu Dağlıq Qarabağdan yüzlərlə kilometr aralıdır. Onda erməniləri nə məcbur edib ki, Dağlıq Qarabağ ərazisindən yox, Tovuz rayonu istiqamətində hücuma keçiblər? Bu, ermənilərin yeni məkrli planlarından xəbər verir.

N.Pavlonov deyib: “Ermənistan-Azərbaycan Dağlıq Qarabağ münaqişəsinin tarixi ilə yaxşı tanışam. Ermənilər heç vaxt bu bölgədə yaşamayıblar. Onlar bu torpaqlara İrandan və Türkiyədən köçürülüblər. Rus yazıçısı, o vaxt Rusiyanın İrandakı səfiri işləyən Aleksandr Qriboyedov öz əsərlərində bu haqda geniş məlumat verib. O, İrandan Dağlıq Qarabağa köçürülənlər haqqında gündəlik məlumatlar hazırlayıb.

Ermənistan Azərbaycanın Dağlıq Qarabağ bölgəsinə təcavüz edib və dost ölkənin torpaqlarının 20 faizi işğal olunub, 1 milyondan artıq azərbaycanlı qaçqın və məcburi köçkün vəziyyətinə düşüb.

Alim deyib: “Əminəm ki, Azərbaycan Prezidenti, Ali Baş Komandan İlham Əliyevin rəhbərliyi ilə torpaqlar tezliklə azad ediləcək, azərbaycanlılar öz dədə-baba yurdlarına qayıdacaq”.