Bundestaqın hakim Xristian-Demokrat/Xristian-Sosialist İttifaqı (CDU/CSU) fraksiyasının deputatı, İqtisadiyyat və enerji komitəsinin üzvü Mark Hauptmanın ofisi “Hauptman Ermənistanın təcavüzkarlığını pisləyir və sülhə çağırır” adlı mətbuat bəyanatı yayıb.

AZƏRTAC xəbər verir ki, deputat Azərbaycan-Ermənistan sərhədində baş vermiş qarşıdurmaya münasibət bildirərək vurğulayır ki, Ermənistan Azərbaycana qarşı təcavüzkar davranışı ilə öz mülki əhalisi də daxil olmaqla bütün bölgəni təhlükəyə atır. O, Ermənistanı Azərbaycan Silahlı Qüvvələrini atəşə tutmaqda və ağır artilleriyadan istifadə etməkdə ittiham edib.

Bəyanatda Azərbaycanın beynəlxalq hüquqla tanınmış sərhədləri daxilində yerləşən ərazilərinin Ermənistan tərəfindən işğal olunduğu və BMT-nin bunu dəfələrlə təsdiq etdiyi bildirir.

Alman deputat Minsk qrupuna çağırış edir, qrupun üzvü olan Almaniyanın digər dövlətlərlə birlikdə münaqişənin sülh yolu ilə həlli üzərində işləməli olduğunu bildirir. O, eyni zamanda, sülh yolu ilə həllin tapılmasına qədər Ermənistanı razılaşdırılmış atəşkəsə riayət etməyə, özünün və Azərbaycanın əhalisi üçün bundan sonra təhlükə yaratmamağa çağırır.