Azərbaycanda parlament seçkilərinə kifayət qədər ciddi maraq var. Cəmiyyətin tanınmış nümayəndələri, gənclər namizədliklərini irəli sürüblər. Bu da müsbət amil kimi qiymətləndirilməlidir.

Fact-info.az xəbər verir ki, bunu Secki-2020.az saytına “Bələdiyyələrin fəaliyyətinin təbliği” İctimai Birliyinin sədri Vüqar Tofiqli deyib.

O, builki parlament seçkilərində yüksək fəallığın müşahidə olunduğunu bildirib. “Əminəm ki, xeyli sayda gəncin, eləcə də cəmiyyətdə nüfuz qazanmış şəxslərin qatıldığı parlament seçkiləri demokratik prinsiplərə uyğun şəkildə keçiriləcək. Ölkəmizin seçki qanunvericiliyi də şəffaf seçkilərin keçirilməsinə imkan verir”, - deyə V.Tofiqli əlavə edib.

Vüqar Tofiqli qeyd edib ki, seçkiqabağı təşviqat kampaniyasında namizədlər həm mətbuat, həm də sosial şəbəkələrin imkanlarından istifadə edirlər.

Onun sözlərinə görə, bütün namizədlər üçün bərabər şərait yaradılıb. Bu da ölkədə şəffaf və ədalətli seçki mühitinin olmasından xəbər verir. Əsas məsələ seçicini seçki günü səsverməyə gətirməkdir. İnanıram ki, seçicilər parlament seçkilərində fəal iştirak edəcək və inandıqları namizədə səs verəcəklər.