Təbii ki, hər bir ölkə belə möhtəşəm tədbirin keçirilməsinin arzusunda ola bilər. Ancaq istəklə reallıq arasında fərq böyükdü. Çox müsbət haldır ki, Azərbaycan belə möhtəşəm tədbiri uğurla təşkil etdi. 

 İstər Azərbaycanın təbliğatı, zəngin mədəni irsimizin nümayişi, istərsə də  çox innovativ xidmət baxımından çox uğurlu işlər görüldü. Kimin necə düşünməsindən asılı olmayaraq belə möhtəşəm tədbirin  keçirilməsi hər bir Azərbaycan vətəndaşına qürur verir. Bütün bu uğurlu işləri təşkil edən,  yerinə yetirən hər bir kəsə dərin təşəkkür düşür. Belə layihələri yalnız alqışlamaq lazımdır.

 Digər tərəfdən bu yarışma idman diplomatiyasının uğurlu nəticələrini bir daha nümayiş etdirdi. İstənilən halda, belə beynəlxalq tədbirlərdən mümkün qədər ölkəmiz faydalandı. Heç şübhəsiz ki, ilk Avropa oyunları başa çatsa da   Avropanın, dünyanın bəzi dairələrinin bu yarışmalara qərəzli münasibəti unudulmayacaq.  Bəs həmin dairələrin qərəzli yanaşmasının səbəbi nədən qaynaqlanırdı?

 Təbii ki, bu, yalnız I Avropa oyunları ilə bağlı deyil. Əvvəllər də olub,  bundan sonra da davam edəcək. Burada səbəblər çoxdu. Bəzi dövlətlərin   Azərbaycana qarşı qısqanclığı var. Bu öz yerində. Burada həmçinin dünyada bəzi dairələrin nəzarətində olan beyin mərkəzlərinin Azərbaycana qarşı çox ciddi qara planlarının olduğunun və bunun zaman-zaman həyata keçirilməsinin şahidi oluruq. Həmin qüvvələr məqamı yetişdikcə belə layihələri gerçəkləşdirməyə çalşırlar. Kifayət qədər ziddiyyətli olan bu  dairələrdə erməni lobbisinin təmsilçiləri ilə bərabər, antimüsəlman, antitürk   qüvvələri cəmləşib. 

Ötən dövrlərə diqqət yetirsək bu fikirlər təsdiqini tapar. Azərbaycanın müstəqilliyini, xüsusilə, iqtisadi müstəqilliyini heç vəchlə qəbul etməyən  qüvvələr vaxtilə nəhəng neft müqavilələri imzalanan ərəfədə belə təxribata əl atırdılar. 1994-cü ilin sentyabın 20-də “Əsrin müqaviləsi” imzalanan kimi, heç həmin sənədlərin mürəkkəbi qurumamış bəzi dövlətlərin rəsmiləri bu müqaviləni tanımadıqlarını bəyan etdilər. Bu nəhəng layihənin baş tutmaması üçün əllərindən gələni etdilər. Ancaq zaman bir daha sübut etdi ki, onların bu bəyanatları, təxribatları heç bir fayda verməyəcək.

Digər təxribat xarakterli məqamlara nəzər salaq. Onu da qeyd edək ki,  Azərbaycanda ailə institutunu dağıtmaq bir çox beyin mərkəzlərinin layihələrinin hədəfində durması şübhəsiz idi. Bu məsələlər özü kifayət qədər araşdırılma tələb edir. Çünki ailə institutunu zəifləməsi, dağıdılması millətə ən böyük zərbə vura biləcək məqamlardır. Belə təxribat xarakterli addımlar  vaxtilə nümayiş olunan əcnəbi seriallarda, bu gün internet məkanında,    xaricdən çox qaranlıq mənbələrdən maliyyələşən qrant  layihələrində, təəssüf ki genişlənən savadsızlıqda və s. özünü göstərir. 

İfrat insan azadlığı, sərbəstliyi nəticəsində geyim mədəniyyətinin əndazəni aşması əslində möhkəm ailə dəyərlərinə ciddi zərbə vurur. Bəzi valideynlər bu selin qarşısında, xaricdən idxal olunan mənşəyi və məqsədi ifrat sərbəstlik olan bu layihələrin qarşısında başlarını itirərək aciz görkəmə düşürlər. Bir çox hallarda geyim, davranış mədəniyyəti sürətlə mənfiyə doğru dəyişib. Narahatlıq  doğuran digər məqam ondan ibarətdir ki, təhsil ocaqları da bu məsələyə biganəlik göstərir. 

Dəyərli oxucular düşünəcək ki, ailə institutunun, geyim mədəniyyətinin,   bəzi dəyərli ənənələrin itməsinin, Azərbaycanın iqtisadi müstəqilliyinin I Avropa oyunları ilə nə əlaqəsi ola bilər?  Əslində cəmiyyətdə gedən bir çox proseslər bir-birilə  bağlıdır. Azərbaycana, ümumilikdə milli dəyərlərə qarşı yönələn təxribat xarakterli layihələr haqqında geniş danışmaq olar.

Ancaq bu gün cəmiyyətin ən yaxşı peyvəndi milli dəyərləri qorumaq şərtilə  təhsilin inkişafıdır. Çünki təhsilsiz cəmiyyətdə istənilən qara planların həyata keçirilməsi mümkün olur. Bu gün cəmiyyətin ən yaxşı peyvəndi Vətəndaş Cəmiyyətinin fəaliyyət sferasının genişlənməsidir. İctimai nəzarətin dərinləşməsi və ictimai qınaqla hesablaşmaq mədəniyyətinin  formalaşmasıdır.

 Bu gün cəmiyyətin ən yaxşı peyvəndi  yalnız Ramazan günlərində deyil, hər zaman insanların nəfsinə hakim kəsilməsidir. Çünki tamah, nəfs bir çox hallarda haramla halalı qarışdırır. Başqasının haqqını tapdalayır. Yaxşı bir ifadə var: “Vətəni sevmək imandandır”. Bu, əziz Ramazan günlərində Allah imanınızı kamil eləsin!