Heydər Əliyev Fondunun vətənpərvərlik mövzusunda həyata keçirdiyi layihələr çox dəyərlidir və böyük əhəmiyyət daşıyır. Belə layihələrdən biri kimi, "Əli və Nino" əsərinin ekranlaşdırılması çox önəmlidir və bu, Azərbaycanın kino həyatında böyük bir hadisədir.

Bu fikirləri Heydər Əliyev Fondunun vitse-prezidenti Leyla Əliyevanın dəstəyi ilə çəkilən "Əli və Nino" filmi barədə fikirlərini AZƏRTAC-ın xüsusi müxbiri ilə bölüşən Qazaxıstanın Türkiyədəki səfiri Abzal Saparbekulı söyləyib.

Filmin Azərbaycan xalqının müstəqillik uğrunda apardığı şərəfli mübarizədən, Azərbaycan Xalq Cümhuriyyətinin yaranması tarixindən, eləcə də XX əsrin əvvəllərində Qafqazda baş verən mürəkkəb proseslərdən bəhs etməsinin əhəmiyyətini vurğulayan səfir deyib: “Əli və Nino” filmi tamaşaçıya xalqlar arasında dostluq və qardaşlıq duyğusunu aşılayır. Bu film Azərbaycanın müstəqilliyini bərpa edəndən sonra çəkilən ən dəyərli ekran əsərlərindən biridir. Azərbaycanın zəngin tarixi və şərəfli müstəqillik yolu var. Bu tarixin və milli azadlıq mübarizəsinin əhəmiyyətli bir parçasını özündə əks etdirən “Əli və Nino” filminin mövzusu hər zaman aktual olmaqla bərabər, düşündürücü məzmuna malikdir. Heydər Əliyev Fondunun vətənpərvərlik mövzularında filmlərin çəkilməsinə geniş yer verməsi olduqca təqdirəlayiqdir”.